政務SEE〡陳穎欣倡設香港「勞模」評選機制

「愛國者治港」下，香港政治走向似乎愈嚟愈「紅」，工聯會立法會議員陳穎欣提出議員議案，建議政府設立「香港勞動模範評選機制」，弘揚「勞模」精神。陳議員仲話，評選機制可以激發香港「由治及興」嘅動力𠻹。阿絲非常同意呢個建議，如果可以「加大力度」，設立由市民公投嘅「議員模範」，阿絲實投陳議員一票。

工聯會立法會議員陳穎欣最近提出議員議案，建議政府設立「香港勞動模範評選機制」，議案將喺今明兩日嘅立法會大會討論。陳議員喺議案提到，設立機制可以弘揚「勞模」同工匠精神、彰顯勞動價值，仲可以「激發香港由治及興的動力，提升新質生產力，構建新型勞動關係」𠻹。

咩係「新質生產力」、「新型勞動關係」？阿絲讀得書少，真係唔識啦。不過，阿絲就記得，原本12日嘅「勞工假」要睇齊17日、俗稱「銀行假」嘅法定假期，立法會最終通過要用十年先完成。即平均每兩年加一日，去到2030年先完全睇齊，「勞動價值」喺政府同立法會眼中，都算可見一斑嘞。阿絲希望陳議員講嘅機制，唔使十年先做到啦。

百度稱須經民主評選

至於「勞動模範」定義係咩呢？阿絲查過中國百度，根據「百度百科」，勞動模範簡稱「勞模」，係「社會主義建設事業中成績卓著的勞動者，經職工民主評選，有關部門審核和政府審批後被授予的榮譽稱號」。勞模又分全國、省，同部委級勞模，而「全國勞動模範」係由中共中央、國務院授予，係「中國最高的榮譽稱號」。

既然講到要民主評選，唔知議案一旦通過，市民幾時有得投票呢？阿絲就建議應該擴大舉辦，設立埋「議員模範」評選嘞，由市民一人一票選「勞模」同「議模」！