政務SEE〡陳國基鄧炳強聲沙開記招 應對旅客滯留新增交通統籌會議

維港除夕煙花匯演結束後，大批中國旅客滯留市區嘅跨境直通巴士站，更有人要夜宿快餐店，甚至流落街頭。香港作為「亞洲盛事之都」，情況當然不可接受啦，難怪生病中嘅政務司司長陳國基都要親上火線，主持跨部門記者會，交代事件之餘，宣布以後因應大型活動，增設一個佢負責主持嘅統籌會議協調交通安排。咦，又係陳國基孭飛，阿絲都數唔清司長身兼幾多職喇。

記者會上，陳國基戴住口罩、用沙啞聲音宣布，日後的大型活動，政府會事先召開由政務司司長主持嘅「大型活動過關交通安排統籌會議」，以協調部門同運輸業界嘅工作。其實陳國基已經身兼多個主席職務，包括區議會資格審查委員會、地區治理領導委員會、憲法和基本法推廣督導委員會……

阿絲發現，今屆施政新風係發生咩問題，就成立一個委員會或統籌會議去解決問題，令司長身兼嘅職責愈嚟愈多，唔通真係一個打十個？

除咗成立統籌會議，陳國基又話會同中國有關部門商討，延長鐵路口岸開放時間，同增加24小時通關嘅口岸；同時，亦會改善道路交通安排，例如喺落馬洲管制站附近，研究設立直通巴專線等。

無獨有偶，一同出席記招嘅保安局局長鄧炳強亦帶病上陣，同樣以沙啞聲音話，12月31日單日有近23萬人次旅客入境，創去年全年最高。而今年1月1日零時至早上6時，6個鐘內有2.6萬人經落馬洲到深圳，係平時周末單日人次嘅5倍，該6個鐘到深圳嘅車流，亦係周末全日嘅3倍。佢話部門已經全力疏導人潮同車流，而旅客過關情況「非常有秩序」，過關旅客排隊最多都係30分鐘啫。

不過，「非常有秩序」嘅只係入到落馬洲管制站嘅旅客，鄧炳強承認管制站外有「超負荷」車流，導致路面擠塞，車龍甚至一度塞到新田公路，佢補充話：「咁短時間有咁大車流，導致塞車係好難避免」。

運輸及物流局局長林世雄就話，31日中午已預計凌晨會有大量旅客過關，所以同過境直通巴士溝通，要求加強服務。不過，凌晨過後交通嚴重擠塞，導致直通巴士同皇崗巴士塞在車陣中，以致未能流轉，疏導唔到市區旅客。

另外，有記者問到政府會否就事件向旅客道歉，文化體育及旅遊局局長楊潤雄冇正面回應，只係話政府過去落力宣傳，加上不停舉辦活動，宣傳效果顯著，所以就有超預期數量嘅旅客來港。

綜合司長同3位局長說法：保安局話過關有秩序、塞車難避免；運輸物流局話叫咗營辦商加強服務，無奈巴士塞喺車陣；文體旅局就話宣傳相當成功，所以旅客量超預期。似乎指向個結論係唔同部門都做得好好，難怪司長總結話：「今次事件，我可以覺得就係呢個跨年倒數匯演其實係好成功，令好多旅客嚟香港」。

阿絲聽到官員咁講都好欣慰，下個月農曆新年又到，希望司長同局長快啲養好身體，繼續舉辦一個成功嘅煙花匯演。