政務SEE〡署理行政長官變長者 連登巴打發現陳國基新職銜

政務司司長陳國基有新職銜？話說特首李家超呢幾日上京述職，陳國基暫代特首職務，今朝（19日）如常喺行政會議前會見傳媒。有「眼利」的連登巴打發現，《Now》報道有關新聞嗰陣，竟然將「署理行政長官」陳國基，錯誤寫成「署理行政長者」，引來一眾巴打絲打嘲笑。

阿絲fact check咗之後，發現當時報道真係打錯字喎，報道內文同熒幕顯示的字幕，都寫錯咗做「署理行政長者」。雖然《Now》網頁其後已立即收起報道，但無阻巴打嘅討論。有人話64歲嘅陳國基被稱為CE（Chief Elderly）亦算合理；亦有網民揶揄事件同西隧收費錯誤一樣，「可能有人干預電腦系統」，仲建議政府調查𠻹。

電視台錯寫丹麥首都為「斯德哥爾摩」

無獨有偶，《無綫新聞》今朝（19日）報道一則有關丹麥派軍人駐守猶太會堂嘅外電時，將當地首都寫成「斯德哥爾摩」。雖然阿絲唔太熟歐洲，不過都知道丹麥嘅首都唔係斯德哥爾摩，而係哥本哈根喎。呢個錯誤又係俾眼利巴打發現，討論區內恥笑聲此起彼落。

阿絲都做咗新聞行業一段時間，手民之誤又真係好難完全避免嘅。但係新聞報道出錯會影響公信力，報道出街前記者、編輯都要睇完又睇，驗屍咁驗。畢竟得啖笑嘅錯字事小，喺草木皆兵嘅時代，各位行家都係小心駛得萬年船喇。