【政務SEE｜何君堯轟Facebook冇杜絕假帳號 指有紐約fans被騙50萬美元】

騙徒手法層出不窮，有人竟然假冒立法會議員何君堯「吸金」？講緊嘅係立法會今日（29日）開會，討論由議員吳傑莊提出嘅「全面打擊網絡詐騙罪行議案」，面對詐騙案件數字持續上升，發言議員同仇敵愾，最肉緊係選委會界別何君堯，原來佢都深受其害。

佢話「網絡詐騙猖獗，無日無之，唔單止騙財，往往有時會騙埋色。」阿絲以為何議員繼續要求政府加強執法、保障市民等等。點知佢話鋒一轉，話呢啲都只係「狹隘詐騙」，真正「廣泛性詐騙、（散布）誤導訊息」嘅係跨國企業——Facebook、維基百科，同Google。

稱fb有320假帳號 有人「磅水」非洲堯

何議員大鬧Facebook冇履行監管責任，任由虛假帳號橫行，「本人照片喺fb都幾普及……有騙徒用我照片行騙，到目前有320個false accounts（虛假帳號），用不同名、姓，甚至中東名、阿拉伯名，非洲人嘅名都有！但竟然都有人信呢個唔係何君堯、係『非洲堯』（的人）！仍然都要『磅水』俾佢！」

更加誇張嘅係，有假帳號竟然成功呃到鉅款，「其中一個個案係50萬（美元），喺紐約嘅fans（粉絲）就係因為咁樣，50萬美金唔見咗，我都唔好意思」。阿絲聽到都為呢位fans肉痛啊，除咗紐約fans，何議員話仲有好多馬來西亞華僑都被騙，「如果要我何君堯黎賠的話，我掹掹緊都賠得起，但我諗連底褲都無埋」。

鬧完fb，何議員仲鬧埋維基百科「假公濟私」，聲稱開放編輯平台，但有政治目的，以抹黑為主導；又以「香港國歌」案為例，指香港政府都係Google嘅受害者。最後，何議員搬出《國安法》，要求港府加強維護國家安全，更揚言「如果佢唔就範，你就告佢，再唔係呢，『拉人封艇』！」

阿絲聽完都驚驚地，即刻睇下follow緊嘅何議員係真身定係「非洲堯」假帳號。