政務SEE｜「應變反駁隊」開響第一槍 葉劉上BBC節目《HARDtalk》同主持人針鋒相對

上個禮拜特首李家超先話要為第23條立法成立「應變反駁隊」，反擊「敵對勢力」的網上文宣。香港行政會議召集人、立法會議員葉劉淑儀禮拜一（29日）受邀上BBC節目《HARDtalk》，同節目主持人史蒂文·薩克爾（Stephen Sackur）針鋒相對，開響「反駁隊」第一槍！阿絲覺得姐姐近期狀態大勇，難怪特首李家超都讚佢對外媒「解說到位、據理力爭」啦！

節目一開始，主持人Stephen好關注香港第23條立法，字字珠璣咁問葉劉：「2020年北京對香港實施一個極為嚴苛嘅《國安法》，2024年香港政府好似下定決心要通過一條更嚴厲嘅國家安全法，點解？」

姐姐明顯有備而來，面不改容咁回應：「我哋由北京授權頒布嘅《國安法》一啲都唔嚴苛，遠遠唔及英國議會嚿年7月頒布嘅《國家安全法案》咁全面同徹底」，仲反問主持人：「你知唔知，你哋新增咗好多新罪行，比起英國，我哋由北京訂立嘅《國安法》係小兒科（nothing than far what you have），英國嘅《國家安全法案》仲嚴厲、全面同嚴苛！」

不過Stephen都唔係省油的燈，反駁葉劉：「呢個好大程度上取決於執行上面，唔係咩？」Stephen望住佢繼續講，「你哋（香港）政府用《國安法》關押反對派、政治人物、民運人士，消除媒體獨立嘅聲音，仲確保市民唔可以再上街示威，所有嘢都好嚴苛喎」。

Stephen更重提葉劉喺2003年推動第23條立法，導致當年50萬人上街表達不滿。仲話如果今日香港人仲可以上街示威，肯定會對佢嘅計劃表達不滿，問佢同唔同意。姐姐就反駁，話自己完全唔同意Stephen講嘅嘢，又話2019年爆發暴力示威、反華暴力、反華示威，「好多人同我講，一早應該喺2003年支持我提出嘅法案！」

Stephen指立會選舉限制殺反對聲音 姐姐：立法機關喺任何層面都比1997年之前更自由

然後Stephen又提到巿民喺參選立法會嘅資格上，受到更多限制，最終令公民黨被逼解散，反問葉劉：「你過去咁多年都有參與立法會選舉，一直都係政治人物，唔通你心裏面一啲都唔擔心，呢個本質上係消除香港嘅反對聲音咩？」

嘩！姐姐參政經驗多過你食米啊！使你教咩！「我哋嘅立法機關喺任何層面都遠比1997年之前更加自由！」佢仲話主持人列舉嘅例子，即係議會反對派，對香港嘅立法機關造成廣泛破壞同好多混亂（disorder），更加話佢哋試圖利用立法機關反對國家。佢又點名前香港立法會議員、香港眾志主席羅冠聰，話佢係因為唔正確宣誓效忠政府而為人所知。

葉劉再使出一招快刀斬亂麻，將矛頭直指主持人：「你哋嘅國家、議會都要求人宣誓效忠。如果人哋唔宣誓效忠、唔認真看待呢件事，佢哋就唔會被你哋嘅議會接納，right？我哋同其他國家嘅立法機構嘅規則（rules）相同」。Stephen就反駁：「你哋係有rules，但你哋嘅rules明顯同好多國家都唔一樣。例如嗰啲容忍、允許、甚至鼓勵新聞自由嘅國家」。

講到呢度，Stephen話鋒一轉，提到《蘋果日報》創辦人黎智英案，黎智英個仔黎崇恩講過「香港政府基本上係懲罰緊一個出版商、一個75歲嘅老人家，因為佢捍衛主權移交時承諾會畀香港嘅自由」，Stephen話包括美國在內，外界好多人都係咁睇，更加促使美國議員推動新一輪對香港嘅制裁。

葉劉即時反駁：「你形容嘅完全係脫離現實，過去幾日喺法庭上嘅所有證據都顯示黎智英指示佢下屬……」Stephen此時直接打斷姐姐：「葉女士，你已經指出咗呢一點，我哋將會在接下來幾週同幾個月睇到法庭嘅進展」。

外資接連遷出香港   姐姐：部分原因係疫情，香港習慣人來人往㗎啦

然後Stephen將話題帶到香港國際金融中心面臨「存在危機」（existential crisis），姐姐即刻就話「因為黎智英嗰班人向美國等國家遊說，阻止資金流入香港……」Stephen忍唔住再次打斷姐姐，「嗰啲區域總部位於亞洲嘅公司、企業正大量流失，因為佢哋喺香港遷出，當中好多公司搬咗去新加坡」，佢又舉例，澳洲國民銀行宣布關閉香港辦公室，「呢個就係你面對嘅現實，你嘅政治環境令你付出巨大嘅代價」。

嘿！你以為咁樣就可以嚇到我哋姐姐咩？無咁易！姐姐從頭到尾都神態自若，「有人移民去新加坡，過去幾年，一啲區域（總部）工作人員離開咗，部分原因係我哋嘅新冠肺炎疫情措施，香港習慣人來人往㗎啦」，仲話「佢哋可以自由遷徙，呢個係《基本法》保障我哋自由嘅一部分」。

姐姐愛國愛港，作為「應變反駁隊」嘅前鋒，的確係打得又睇得。新嘅一年唔好咁悲觀，要向好嘅方向睇，in 姐姐 we trust！