財赤下民建聯議員倡加罰款 違例泊車、遲交報稅表、遲還圖書

香港面臨千億元財政赤字，民建聯會計界立法會議員黃俊碩今晨（9日）出席電台節目，建議港府增加罰款，包括違例泊車、遲交報稅表、遲還圖書等，「好多罰款有加嘅空間」。隨後有市民致電節目申訴，陳先生指港府應減少內部開支，尤其近年開設高官職位，又稱立法會已「一體化」，委任數十位就夠，可以節省公帑。雷小姐批評，市民面對各樣加價，質疑是政府帶頭加價。

黃俊碩今晨出席港台《千禧年代》節目，他指一些不涉必要或民生的服務有加價空間，例如申請保安牌、無犯罪紀錄（俗稱良民證）等。他又建議可上調罰款，包括違例泊車、遲交報稅表、遲還圖書等，「嗰啲始終係犯法或違法行為」。

翻查資料，現時違例泊車罰款是320元，遲交報稅表可被判處罰款10,000元。而公共圖書館遲還圖書，根據《圖書館規例》，成人圖書館每項每天罰款1.5元，青少年及兒童圖書館則為0.5元。黃俊碩認為，增加罰款可以改變市民習慣，又建議公共服務收費每隔3至5年跟隨通脹調整。

去年民建聯曾提倡財政預算案派發消費券，但黃俊碩今日認為消費券只有短期提振經濟效果，亦令市民依賴消費券。他聲稱，派消費券加劇物價上升，「某程度派錢亦都類似我哋講量化寛鬆、印銀紙啦，當然印銀紙令到我哋銀紙貶值，商品價格相對提升」。

市民批90議員太多「委任幾十個就算囉」

有市民致電節目申訴，陳先生質疑港府應先控制開支，「點解你政府內部開支唔調減呢？好似你而家設咁多職位，副秘書長、副政務司長，設咁多位」。

他認為應該改革立法會有90位議員的制度，「你而家（立法會）差唔多一體化，你乜委任幾十個就算囉，就唔使嘥咁多公帑支咁多議員費用，嗰啲議員開會瞓覺又有、無返工又有、睇手機又有，甩甩漏漏」。

另一位市民雷小姐不滿港府擬上調公立醫院急症室費用，「如果唔係私家醫生收得咁貴，邊個人會去急症室等幾個鐘呀？你又控制唔到私家醫生收費，你去（公立）醫院睇又話要收得貴。」

她亦將矛頭指向立法會議員，「嗰啲議員，講真，如果你真係為香港服務，你個名已經賺咗啦，你要名仲要利？應該你想做議員就唔好收錢，就證明你有心為香港人喇！」雷小姐慨嘆政府現時是帶頭加價，「啲小市民呢樣又加，嗰樣又加，你政府帶頭加價，你有咩會唔加先得㗎！」

學者：加公共收費難紓千億財赤

中大劉佐德全球經濟及金融研究所常務所長莊太量指，調整公共收費對改善財赤幫助不大，「各項收費都係講緊100億（元）左右，就算你加一半，都係50億，同政府成千億財赤差好遠」。他指，部分政府收費是私人機構行政成本一部分，「當然短期會影響到佢哋生意，但如果你一唔加，之後更難收回成本」。

對於陸路離境稅建議，他認為比較難實施。首先，在中港融合大背景下，離境稅與國家政策相違背。其次，若只向香港人徵收陸路離境稅，有歧視問題。再者，陸路離境稅在過關哪個環節徵收亦成問題，「每人過關得幾秒，你喺身分證入啲錢落去，然後每次扣咩？」

行政長官李家超今晨回應會否增加公立醫院急症室費用。他指，急症室應用於最急切人士，當局會檢視急症室服務防止被濫用。他指，政府有恆常機制檢討公共開支收費的適當性，必須要考慮社會實際情況，對弱勢社群的照顧，評估對不同人士或行業的影響。