政務SEE｜葉劉再戰羅奇：希望佢唔好再自命為香港嘅先知

身為「反駁隊」嘅行政會議召集人葉劉淑儀日前投稿《Hong Kong Free Press》，再次隔空筆戰羅奇！話說呢位昔日中國大好友、摩根士丹利前亞洲區主席羅奇（Stephen Roach）上個禮拜嚟香港演講，呼籲香港要捍衛獨特性，證明同中國其他城市唔同，又警告香港認為困境會自行消失，最終會後悔。葉劉狠批羅奇言論流露出股票經紀人嘅膚淺同短視，仲叫佢唔好再自命為香港嘅先知咁話。

葉劉篇文以「退休銀行家羅奇唔係香港嘅先知」（Retired banker Stephen Roach is no prophet of Hong Kong）為題，用「退休銀行家」稱呼羅奇，嘲諷佢似乎想開創做「香港預言家」的新事業，沉浸喺預測香港未來，又話佢嚟香港咁多次，言論流露出股票經紀人嘅膚淺同短視，一遇到困難就撤資。

羅奇上個禮拜出席香港外國記者會午餐會演講，提到美國唔願意區分香港同中國，香港最好捍衛自己嘅獨特之處，證明唔係另一個中國城市。佢又話，香港經濟已經俾中國吞噬，如果中國經濟唔反彈，香港經濟唔會重振生機。

葉劉反駁，話香港經濟一啲都唔差，香港確實面臨嚴峻經濟挑戰，但強調未來係光明嘅，因為香港努力進行「經濟結構調整」。佢解釋，香港同中國大灣區融合，加速經濟轉型。佢又讚廣東省嘅服務業喺疫情解封後大有起色，成千上萬嘅香港人放假北上購物，簡直同10年前一模一樣。

葉劉話香港同大灣區「一體化」，互助嘅關係係雙贏嘅。例如中國城市歡迎香港人，香港亦都歡迎中國勤勞嘅工人嚟補充本地老化嘅勞動力，如技術人員、工程師等各領域嘅「高端人才」。佢又感謝祖國嘅大力支持，「香港永遠唔會缺乏我哋所需嘅資源，去加強我哋嘅人才同技術」。

羅奇指《國安法》削港自治 葉劉駁「唔通美國無《國安法》？」

羅奇今年2月喺《金融時報》發表「香港玩完論」提到香港「玩完」其中一個原因係因為《國安法》嘅實施，削弱香港自治。葉劉直接批評羅奇，「令人費解嘅係，好似羅奇先生一樣咁飽經滄桑嘅人，一直對香港嘅《國安法》喋喋不休」，又反問羅奇，「唔通美國無《國家安全法》咩？」

講到世界各地嘅《國安法》，葉劉就好似非常熟書噃。佢如數家珍，話美國有好多關於《國安法》嘅條文，澳洲、英國同新加坡近年都加強《國安法》防範「外國勢力干預」同「敵對國家威脅」喇，又隔空問羅奇，「點解香港唔可以制定《國安法》，保護祖國安全，恢復秩序穩定？」

熟悉美國嘅葉劉即刻舉例，話美國警方喺短時間佔據校園，清理支持巴勒斯坦嘅抗議學生，又話2019年香港反修例運動，香港市民喺警察行動之前遭受幾個月嘅暴力同破壞，仲稱讚警察完成任務之餘，又無造成任何致命傷害，形容係「西方國家難以想像嘅壯舉」。葉劉振振有詞：「我希望羅奇先生唔好再將矛頭指向我哋，而對佢自己國家嘅國安執着同粗暴執法視而不見」。

批羅奇停留喺「舊香港時代」 唔好自命為香港嘅先知

羅奇上週演講嘅時候提到，「昔日嘅香港已經唔係今日嘅香港，更加唔係聽日嘅香港」，認為過去香港嘅自豪令人敬佩，甚至係鼓舞人心，但自豪並唔能夠成為行動嘅準則（your pride in the past is admirable almost inspirational but pride is not prescriptive）。

雖然只係比羅奇細5歲，葉劉就批評羅奇仲停留喺「舊香港時代」，嗰個可以喺房地產同股市投機取巧嘅年代。佢話樓市緩和唔係壞事，投資者可以反思真正價值，又肯定「中國唔會停滯不前，香港都唔會」。

文章嘅結尾，葉劉話香港好似中國咁，正在向新嘅經濟模式轉型。佢直批：「羅奇先生對於香港失去舊有魔力嘅咆哮，同我哋嘅未來無關。我希望羅奇先生能夠清晰地意識呢點，唔好再自命為香港嘅先知，被自己言論獲得嘅關注沖昏頭腦。」（Mr. Roach’s rant about Hong Kong losing its old magic is irrelevant to our future. I hope Mr. Roach would wake up to this, and stop getting too carried away by the attention he is getting by pretending to be a prophet of Hong Kong.）

羅奇發表「香港玩完論」（Hong Kong is over）後，就已經同葉劉唇槍舌劍咗幾個回合喇。葉劉當時反駁港股持續下滑係因為美國政策，又話羅奇幾年無嚟香港，歡迎反嚟睇吓香港嘅繁榮發展。羅奇立刻「駁上駁」，話葉劉搞錯事實，其實自己嚿年3次到訪香港。

唔知被葉劉稱呼為「退休銀行家」嘅羅奇，今次又會點反駁姐姐嘅反駁呢？