政務SEE〡批垃圾徵費擾民 駁局長指環保餐具較平 唐英年：「滾」你㗎咋

垃圾徵費變成港府燙手山芋之際，素有「政壇金句王」之稱嘅前政務司司長、全國政協常委唐英年，今日（12日）出席活動嗰陣又再語出驚人噃，批評政府喺咁嘅社會環境推行徵費，實屬擾民。佢仲擺明車馬唔信環境局局長話環保餐具價格會較平，「『滾』（欺騙）你㗎咋」，直言廠商可能「聽日就加價」。阿絲真係好欣賞咁真性情嘅「唐唐」啊！係久違了嘅真情流露！

呢段片係唐唐今日（12日）出席「香港新聞工作者聯會兩會精神分享會」時嘅發言，有電視台引述現場片段，佢喺會上評論垃圾徵費政策。佢話相信香港市民支持環保，「不過，唔好喺呢啲咁嘅社會環境之下去擾民」，佢又反建議政府諗清楚政策目標，「唔好一邊增塑，另一邊又話減塑，咁你（政府）想增定想減啊？」

指官員離地 不懂基層食無定所

愈講愈興奮嘅唐唐仲批評，即將實施嘅「禁用即棄塑膠製品」「離地」𠻹，「今時今日好多基層工人要喺車上、地盤、在寫字枱上食飯，好多方法，唔係一定茶餐廳坐低食。佢買飯盒返去，（如）用紙飯盒買個咖哩雞，十分鐘後唔變軟（嘅）紙盒好貴。環境及生態局局長話『唔係㗎，一樣價錢，可能仲平啲』，『滾』你㗎咋！可能搵到一千零一間平啲，今日賣晒，聽日新貨就加價。我絕對唔相信香港商家唔識加價！所以（官員）唔夠『接地氣』」。

現場片段所見，同場嘅立法會議員兼全國人大常委李慧琼笑得好開心，當聽到唐唐話局長「滾你㗎咋」現場仲傳出笑聲同掌聲𠻹。

作為前朝高官嘅唐唐，咁直接唱淡環境政策，會唔會影響政府管治威信㗎？定係佢真係唔睇好呢個環保政策呢？