政務SEE︱政府擁抱中國水 公僕團購香港水

早前有報道話新一批招標結果出爐後，有政府部門改用中國品牌飲用水，近日政府合署地下竟出現「奇景」！一度堆滿超過50箱香港品牌樽裝水！消息話係公務員自行團購，喺網購平台訂貨㗎！有網民讚政府今次如意算盤打得好好，唔單止份合約慳到1,600萬，仲刺激埋「內需」、促進經濟！但亦有人擔心，唔飲祖國嘅「Happy水」，會唔會被視為「軟對抗」，搞到當局唔「Happy」呢？

上周社交平台流傳一張喺金鐘政府合署影嘅相，題為「政府辦公室飲用水轉內地品牌後 成功令一班公務員自己訂水？」，可見逾50箱本地品牌水擺晒喺地下，準備送貨去唔同部門，工人仲透露，唔少公務員自己夾單訂水「自己買自己飲」，包括有「飛雪Bonaqua」礦物質水、維他蒸餾水、屈臣氏旗下「Cool清涼水」等。

有疑似喺政府辦公室做嘢嘅網民透露，「今日已有人訂左十幾箱水返嚟，冇人飲happy水，長期唔洗訂水，何止慳1,600萬」，「飲左一日觀音水結論：冇味水喉水，勁難飲呀！靠淨低嘅cool吊命！睇嚟去食飯都要斟埋水返嚟飲」。

亦有網民感激「又可以減輕財赤」、「庫房支出又減少咗啦」、「刺激本地消費 用心良苦啫」、「政府呢招夠晒絕，一招雙刃劍，同時解決二個問題」。

網民憂：仲唔係軟對抗？ 唔肯飲祖國水真係要查一查佢

不過，有網民憂慮公僕們安危，擔心「仲唔係軟對抗？」、「宣咗誓要愛祖國，而家唔肯飲祖國水真係要查一查佢」。

阿絲嘅公務員朋友就話，唔單止金鐘政府合署有同事訂水，其他地區嘅公務員同事仲會自己帶水，或者用多啲茶水間部熱水機。

翻查資料，政府部門辦公室嘅飲用水合約為期3年，分港島與離島、九龍、新界三個區，九龍區中標嘅係屈臣氏集團「COOL蒸餾水」、新界區採用時貿國際嘅「Happy喜士」、港島及離島區則有鑫鼎鑫商貿嘅「鑫樂－觀音山」品牌。新合約總額1.66億元，對比上一份採用「COOL蒸餾水」同太古可口可樂「Bonaqua」嘅合約，慳到約1,600萬元。

李家超：如發現唔符合標準 可即時取消合約

不過，公務員咁驚唔想飲中國品牌水都情有可原，例如「鑫樂」製造商樂百氏喺3年內曾6次被中國官媒點名上黑榜，包括微生物超標、涉及致癌物溴酸鹽等。

特首李家超月初就大派定心丸，強調非常重視公務員飲用水安全，除咗投標時要求提供獨立實驗室水質安全認證等，仲會不時要求供應商提供認證，並唔係只交一次，亦都會不時抽驗確保水質安全。李家超講明，如果發現唔符合標準，可以即時取消合約關係。當局補充，供應商每兩個月就要交一次測試報告，而第一次報告就會喺今個月提交畀物流署。