工聯會建議額外獲產假60日 30歲以上產婦無份

工聯會今朝向特首李家超遞交《施政報告》意見書，會長吳秋北同副會長等人喺會後見記者，話工聯會向特首提出咗百幾項建議，其中最吸睛嘅就係一籃子改善生育率建議。

佢哋建議開多個官職，設立為期24個月嘅生育、託兒專員，負責制定託兒服務政策，仲建議延長婦女產假到16周，而且每生多一個，可以增加15日產假，不過最令政務絲側目嘅，就係佢哋建議24至29歲女士，可以額外多60日產假。

喂！依家係咪年齡歧視先！阿絲我大把女性朋友都係30歲後先生仔嘅，而且，高齡產婦比年輕女性生仔，需要更多時間復元，係咪更應該獲得更長產假先？撇開歧視唔講，根據統計處今年2月發布嘅《1991年至2021年香港生育趨勢》數據，香港近年生育下跌其中一個原因就係遲婚，初婚年齡中位數更升至30.6歲，大把女士喺24至29歲都未結婚喎，多60日產假都「無用武之地」啦。

阿絲就想問吓各位姊妹，增加產假真係可以增加大家生仔意欲？唔使講咁遠，同樣係工聯會，佢哋嘅婦女事務委員會今年三八婦女節嘅時候，就做咗個調查，發現香港七成人唔考慮生育，主要原因係身體狀況、育兒經濟負擔大，同埋教育、供養責任大，好明顯就係擔心經濟上負擔唔起喇，生咗出嚟，政府幫手養咩？多幾日產假有鬼用？

其實好多發達國家面對生育率低嘅問題，就攞新加坡為例，佢哋嘅鼓勵生育措施就包括現金獎勵、優先買樓、首置房屋津貼達110萬港元。生頭兩個小朋友有約65,000港元現金，第3個及之後每生一個再增至約77,000元； 仲有，政府會先存入約3萬元去你小朋友嘅戶口作前期資金，子女滿12歲前，父母喺同一個戶口存入款項，政府就會有同等金額嘅供款！

未完！有小朋友嘅家庭預購組屋（類似香港居屋）有優先權，買4房以下組屋嘅資助額約47.3萬元，首次買私樓嘅家庭可以有高達約110萬元嘅政府津貼。睇到呢度，如果阿絲係坡妹，真係忍唔住即刻拉老公入房啊！

反觀香港呢，本年度《財政預算案》先至提出由2023/24年度起，提高子女免稅額到13萬元，成日話要將香港同新加坡比較，香港喺呢方面，真係徹底完敗。