政務SEE｜陳智思：港人仍可自由批評政府 李華明：國安法保障長久穩定對政改有利

《基本法》23條立法後，唔少政治人物爭相唱好香港。前行政會議召集人陳智思今（19日）投稿《南華早報》，話事實就係香港人仍然可以好自由咁批評政府，仲舉咗三個事例證明𠻹，包括垃圾徵費、夜繽紛、杜拜王子風波。民主黨創黨成員李華明就投稿《明報》，讚揚《國安法》保障下香港長久穩定，對民主政制改革必然有利，仲話相信民主改革會再次啟動𠻹。因為「初選案」還柙中嘅民主黨人睇到呢篇評論，唔知有咩感想呢？

英文流利嘅陳智思投稿《南早》，文章標題係「The fact is, Hongkongers are still freely critical of the government」（事實是，香港人仍然可以自由地批評政府），表明香港言論自由無變。

佢話《國安法》立法後，一啲充滿敵意嘅國際媒體報道（hostile international media coverage）影響咗好多國家嘅觀點，好多外國人以為批評香港政府任何事都充滿危險，但事實並唔係咁。

陳智思同一個歐洲記者解釋，市民、立法會議員、媒體經常表達同政府唔同觀點，例如垃圾徵費就係一個絕佳例子，各界人士辯論、積極表達同政府唔一致立場嘅觀點。而杜拜王子風波就引起了傳媒批評，令政府內部尷尬。

陳智思又「親身示範」批評港府，話港府推出嘅「夜繽紛」旨在振興本地企業，但對經濟嘅影響輕微（had a minimal impact on the economy），形容「夜繽紛」喺社交媒體引起相當大嘅批評聲音。

之但係阿絲觀察到，23條立法後批評政府嘅聲音的確少過以前噃，陳智思都認同香港存在一定程度嘅自我審查，話係因為有啲人寧願避開某些話題或公開評論，擔心令政府難堪或破壞現狀喎。佢認為可以理解，形容係「個人選擇」。

陳智思喺文章結尾表示，只要心中為香港最大利益着想，就可以毫無畏懼地公開討論。唔知陳生係咪識讀心術呢？阿絲想請教佢點樣可以知道評論者心入面係咪為香港着想，真係好想「毫無畏懼」地瘋狂討論啊！

李華明搭郵輪遊地中海 糾正美國遊客誤解

民主黨創黨成員、前立法會議員李華明亦加入唱好行列。佢今日投稿《明報》話，《基本法》23條完成立法，「讓市民的心中石頭終於落地」，又分享一年前搭郵輪去地中海玩，遇到一批美國遊客，佢哋認為香港已淪為中國一個普通城市，失去民主同自由。

李華明就話，自己作為「泛民成員」、特區和中央認定「反對派的政治人物」，旅程中糾正美國人嘅誤解，強調英國統治下嘅香港民主非常有限，自由亦受限制。而2019年反修例運動以嚟，民主進程受阻，直選成分較之前大幅減少。但佢相信喺國安法「保障」下，香港嘅穩定將係長久嘅，對民主政制改革必然有利。

佢喺文章結尾表明，「我深信民主改革的討論將會再次啟動，肯定中央政府會支持」。