週一 週二 週三 週四 週五 週六 週日
1234567
891011121314
15161718192021
22232425262728
2930  

政務SEE〡收編第四權? 建制傳媒人獲委入「三會」

喺文明同有言論自由嘅社會入面,「傳媒」被視為是三權之外,協助市民監察政府嘅「第四權」,不過,港府噚日公布嘅地區「三會」(分區委員會、地區撲滅罪行委員會及地區防火委員會)委員名單,有部分建制傳媒背景人士獲得委任,做記者做到可以入「三會」都算係成功「向上流動」喎。阿絲醒起前特首林鄭月娥講過,香港係實行行政主導嘅「三權配合」,唔知以後使唔使改叫「四權配合」呢?

民政及青年事務局噚日公布,分別委任1,937人、536人及526人為新一屆分區委員會、地區撲滅罪行委員會及地區防火委員會(統稱「三會」)嘅委員。任期由噚日開始,為期兩年。另外,港府亦委任全數現屆區議員成為「三會」委員。

上屆委任「敗部」 拒委任民主派議員

記性好嘅讀者可能仲記得,2019年區議會選舉民主派大勝後,港府拒絕委任區議員做「三會」成員,反而委任唔少區選「敗部」入會,當時政府講法係「用人唯才」,又話區議員「已有足夠渠道反映意見」。

但今年又重新委任區議員入會喇,民青局局長麥美娟接受《星島日報》專訪就話,喺「完善地區治理」後,「三會」有更重要嘅職能,而委任區議員之後,區議會、三會及關愛隊三個板塊就有最好嘅「有機結合」嘞。

麥美娟仲話,今次嘅做法唔係新鮮事,喺第6屆(上屆)區議會前都係咁安排,譬如佢做區議員嗰陣,亦都擔任分區委員會委員。不但令區議員更了解分區會嘅工作,亦多一個渠道俾區議員參與地區工作𠻹。既然局長係咁諗,點解上屆又唔委任呢?

李臻獲委任 2020年訪林鄭被指問得「溫和」

另一樣阿絲覺得新奇有趣嘅係,名單入面幾名新丁係有傳媒工作背景,包括前有線新聞總監李臻(獲委任南區撲滅罪行委員會委員)、鳳凰衛視香港台副台長秦玥(獲委任黃大仙西南分區委員會委員)、大公文匯全媒體新聞中心高級編輯王俊傑(獲委任大嶼山分區委員會委員)同埋大公文匯全媒體記者李九歌(獲委任屯門區大興及山景分區委員會委員)。

獲委任嘅傳媒人全部來頭唔小㗎,最具知名度當然係前有線新聞總監、現擔任香港賽馬會公共事務副總經理嘅李臻。近年經典事件係2020年有份負責有線新聞部裁員方案,引起員工不滿。裁員事件後,流出一段佢訪問前特首林鄭月娥嘅片段,片段顯示節目中場休息期間,林鄭語帶不屑咁笑稱提問「好Mild(溫和)」,李臻陪笑道,「第二節會硬淨啲」。

入職大公文匯3年訪李家超 自言:出道即巔峰

至於同阿絲一樣咁靚女嘅李九歌,網上就有佢喺2018至2019年間,主持無綫電視《普通話天氣報告》嘅片段。嚿年5月,佢以「大公文匯傳媒集團全媒體新聞中心記者」專訪特首李家超,喺「記者手記」仲話:「入公司近3年來第一次有機會專訪特區政府官員,而且受訪者還是特首!所謂『出道即巔峰』大抵就是形容我這種感覺了吧!」

上月,李九歌以「點新聞」記者,到北京採訪兩會,仲話特別着住「中國紅」西裝,慶祝全國兩會圓滿閉幕。

鳳凰衛視香港台副台長、香港新聞採訪中心主任秦玥,喺2022年當選「香港大學畢業生議會」常委會委員。《大公文匯》網報道,祖籍天津的秦玥,分別喺06年和14年畢業於港大新聞系同埋政治及公共行政系。報道話佢曾經以記者身份專訪過多位香港知名人士,包括去年9月作為深圳衛視「直新聞」駐港記者,赴港大校長官邸專訪張翔。

文匯記者入學校講解憲法

另一位獲委任嘅係王俊傑,阿絲就搵到,今年1月有一位「大公文匯全媒體中心高級編輯王俊傑」,到香港某中學向130位師生講解「憲法、基本法與香港國安法」。根據「點新聞」報道,活動係「香港文匯管理學院」開辦嘅「香港賽馬會特約.媒體資訊素養教育項目」活動。恕阿絲孤陋寡聞,記者入學校教憲法都真係第一次聽。

見到咁多位建制傳媒人加入政府地區治理架構,唔知有冇位留俾阿絲呢?為表誠意,等阿絲即刻訂返套「中國紅」西裝先。

相關文章

熱門文章