政務SEE｜財委會預留90分鐘開會 唔夠3分鐘投票完事

「完善」後嘅立法會真係好有效率㗎！例如今日（1日）召開財委會，原本預留90分鐘時間開會，討論衞生署保留有時限嘅編外職位，結果唔夠3分鐘就完事，議員大比數贊成通過建議。討論？唔使㗎！因為2月7號財委會轄下嘅人事小組委員會通過咗，唔建議財委會進一步討論，咁財委會就唔討論㗎喇。阿絲好奇，今次會議唔知有冇創下財委會最短開會時間呢？

立法會財委會負責審批政府公共開支建議，做記者嘅一定要睇到實啦。阿絲今日打開立法會直播，會議喺下午2點49分17秒開始，到下午2點51分33秒，財委會主席陳振英啱啱講完「我宣布今日個會議結束喇，多謝大家」，頭尾加埋係兩分鐘16秒。

但睇返立法會議程，財委會預留充足開會時間，由下午3點開到5點半。90分鐘嘅會議最後唔使3分鐘就完事，呢種開會效率真係值得本港各大私人企業、政府部門學習啦。

點解可以極速開完會？等阿絲同大家拆解吓。首先，財委會今日得一個議程要討論，就係審議人事編制小組委員會喺2月7號提出嘅建議，保留衞生署1個總系統經理有時限嘅編外職位。

根據會議紀錄，2月7號人事編制小組委員會喺投票通過建議後，主席易志明加多一項表決，就係建議財務委員會進一步討論，然後議案被否決。簡單嚟講，即係小組委員會通過表決，「唔建議」財委會進一步討論。

於是今日財委會主席陳振英，引用財委會會議程序3A，直接將建議付諸表決，唔需要再討論。投票時大部分在席議員都舉手贊成，唯一係新思維狄志遠反對，當然唔影響大比數通過啦。

陳振英講完「我宣布今日個會議結束喇，多謝大家」，工聯會嘅陳穎欣、吳秋北隨即面露笑容，神情輕鬆。呢個時候阿絲諗起工聯會老將王國興名句：「拉布一天，浪費255萬元公帑！」今時今日，財委會唔再拉布，結果變成3分鐘完事，真係兩個極端喇。

資深傳媒人林妙茵幾日前寫文分析過，1月起由工務或人事小組「建議不討論」，而直接表決嘅議案有48項，涉款約1,186億，有討論嘅27項，涉款約480億。數據很誠實，財委會發生「建議不討論」情況似乎愈嚟愈常見。

講到呢度，阿絲決定都係收工唔OT，各位Happy Friday呀！