陳健波批新股上市屢潛水 「股民唔係水魚嚟㗎」 黃英豪倡港府動用基金買新股

近年港股表現不振，保險界立法會議員陳健波今（8日）在立法會批評新股上市屢「潛水」，「股民唔係水魚嚟㗎嘛，邊有人有興趣投新嘅股票？」進出口界議員黃英豪建議，港府動用基金入場購買IPO新股，「市場好需要有呢個訊息」。港交所行政總裁陳翊庭承認IPO萎縮，「我哋自己都知道唔係皇帝女唔憂嫁」，她又強調今年首季收到65宗上市申請，較去年同期增加3成。

港股今年首季只有12隻新股IPO（首次公開募股），總集資額不足50億元，以新股融資額計算，全球排名跌至第10位。港交所去年3月推出特專科技公司上市機制（俗稱18C），放寬新能源、新物料、半導體、人工智能公司在主板上市，但新規則推出一年，至今仍然是零掛牌。

港交所新任行政總裁陳翊庭今（8日）出席立法會財經事務委員會時，為18C零掛牌解畫，「當然入面都有啲複雜化嘅，因為譬如一啲高端科技行業呢，可能有啲外地投資者擔心有制裁嘅風險」。

多位議員不滿港股近年表現。早前獲港府委任做港交所董事的陳健波指，很多股民投訴新股上市後，股價很快跌破招股價，「譬如10隻可能有8、9隻『潛水』，呢個真係非常之差！股民唔係水魚嚟㗎嘛，你咁樣做邊有人有興趣投新嘅股票？」

民建聯的黃英豪就建議，港府動用基金入場購買IPO新股，「用西諺講一句，put your money where your mouth is（以行動證明自己的話）……市場好需要有呢個訊息」。財經事務及庫務局署理局長陳浩濂指，港府新成立的「香港投資管理有限公司」有一定投資彈性，會反映議員意見。

而選委會界別議員何敬康將IPO萎縮的矛頭指向港交所，批評上市審批過份嚴謹，「以前就生意唔憂做，而家嗰啲客仔嚟㗎……唔係成日審犯咁審，當佢賊扮！」行會成員、商界議員林健鋒指，新股申請2至3年未能上市，批評港交所審批時，查問一些「除褲放屁」的問題。

港交所CEO：知道唔係皇帝女唔憂嫁

港交所行政總裁陳翊庭指，過去一、兩年IPO萎縮是全球性問題，香港不可以獨善其身，「我哋自己都知道唔係皇帝女唔憂嫁」。她強調近期有正面訊號，今年首季收到65宗IPO申請，較去年同期增加3成，「大家要睇到市況好轉喇，先會蠢蠢欲動，覺得做IPO信心高啲」。

陳翊庭指，去年新股主板上市的審批時間中位數為48個營業日，相對2022年的70日已大幅進步。去年港交所完成很多上市申請，並獲上市委員會批准，但發行人認為時機未適合，不想「賤賣」股份，於是停下上市腳步，形容港交所相對被動。港交所今年會檢視新股定價程序，讓有能力議價的機構投資者與發行人博弈，訂出吸引水平。

現時中國的公司來港上市集資，需要在中國辦理備案，被外界質疑是減慢上市的進度。陳翊庭指，一直有與中國當局溝通備案制度，「佢哋最近係有提速、加速」。證監會企業融資部執行董事戴霖指，中國有不同監管機構，形容她們不習慣處理一間公司能否在港上市。

新投資移民計劃收50申請

港府今年在財政預算案重推「投資移民」計劃，只要投資3,000萬元，便可以透過計劃申請來港定居。陳浩濂透露，這個新資本投資者入境計劃（CIES）接受申請一個多月，已經收到50宗申請和1,800個查詢，形容反應踴躍。若按50宗申請全部成功獲批計算，等於吸引15億元新資金來港。

翻查資料，財經事務及庫務局局長許正宇曾表示，當局對新投資移民前計劃沒有硬指標，但提到以往平均每年會有4,000人申請，若以3,000萬元投資額計算，能為香港帶來1,200億元的新資金。