政務SEE〡《信報》揭至少兩行會成員預算案減稅務優惠前換電動車

財爺新一份預算案「糖份」大減，處於赤貧嘅阿絲當然最關心有冇現金或者消費券派啦。不過對有車一族嚟講，仲有一樣措施「減糖」，就係削減電動私家車稅務優惠。之但係，《信報》今日話有兩位行會兼立會「雙料」議員相當幸運，趕及喺新措施公布前，免稅換電動車，慳咗超過10萬蚊稅。阿絲都戥兩位議員高興，真係希望阿絲都可以好似兩位議員咁「獨具慧眼」。

財爺喺預算案宣布電動私家車稅務新安排，包括電動私家車「一換一」計劃下，首次登記稅寬免額上限由28.75萬元下調至17.25萬元，減幅達40%（11.5萬元）。另外，基於「能者多付」原則，稅前車價超過50萬元嘅電動車將不獲寬免。

換言之喺舊方案下，任何電動車都可以享受最高28.75萬元稅務優惠。但新方案車價只要高過50萬，就一蚊都無得減；即使車價低過50萬，寬免上限亦只有17.25萬。新舊方案比較下，稅款差距都算相當大喎。

「有議員相視而笑，場面耐人尋味」

有人話「機會係留俾有準備嘅人」，《信報》政情專欄余錦賢今日（1日）話，財爺前日喺立法會宣讀預算案，讀到有關電動車段落嗰陣，「引起不少代議士愕然，互相左顧右盼，竊竊私語，有議員更相視而笑，場面頗為耐人尋味」。

「竊竊私語」當然可能交流政策意見，但專欄引述消息話，原來近期至少有兩名身兼行會及立會「雙料」議員，買咗德國品牌嘅電動車，成功避過繳交十萬元計嘅稅款。專欄仲引述唔少議員盛讚買咗車嗰兩名議員，趕及喺新措施出台前免稅換車「真是幸運」。

咁好彩嘅事，難怪議員喺議事廳、嚴肅嘅預算案宣讀場合「左顧右盼」、「相視而笑」囉。睇返資料，香港現時市佔頭3名嘅德國品牌電動車，包括寶馬（BMW）、Benz同埋Porsche。

阿絲當然想向眼光獨到嘅高人偷吓師喇，睇返現時嘅「雙料」議員共有8位，分別係葉劉淑儀、林健鋒、張宇人、廖長江、劉業強、陳健波、吳秋北同陳克勤。唔知邊位可以教下阿絲呢？

梁錦松涉偷步買車 慳稅19萬元

翻查資料，喺2003年時任財爺梁錦松爆出「偷步買車」，被揭發喺預算案公布加稅前個半月，購入一部凌志房車。事件俾《蘋果日報》揭發，梁話係「無心之失」，宣布捐出稅款兩倍共10萬蚊俾公益金，但之後有車行發現梁計錯數，實際慳稅19萬元，做財爺嘅梁錦松認計錯，再改捐38萬元。同年3月10日，梁提出請辭被特首董建華挽留。喺當年「七一」遊行後，梁請辭獲准。