政務SEE〡區議會「地區設施及工程委員會」開會55分鐘 30分鐘講撐23條

改制後嘅首屆區議會履新超過一個月，特首李家超曾經要求全港470名區議員要將精力放喺服務居民上，中西區區議會有個專責地區設施工程嘅「地區設施及工程委員會」，日前開會55分鐘，結果有30分鐘由議員發言撐23條；相反，議程內真係講地區設施嘅「公共圖書館使用情況」，就冇一個議員發言喇。

上星期四（2月1日），中西區區議會轄下嘅「地區設施及工程委員會」（簡稱：地工會）舉行第一次會議。根據區議會網頁，嗰日會議一共有7項議程，除去通過議程、主席報告等嘅會議程序，實際涉及地區設施嘅議程只有兩項，都係由康文署提交嘅公共圖書館、康體設施管理情況。

圖書館使用情況 冇人提問下結束討論

唔知係咪康文署提交嘅資料太完善，委員會主席葉永成問有冇人就公共圖書館使用發言時候，會議「dead air」近一分鐘，最終議程喺冇人提問下結束。到康體設施使用情況時候，就有6名議員提問，討論持續約12分鐘。

會議到呢度只係用咗23分鐘，已經嚟到「其他事項」，阿絲都知，其他事項通常意味準備散會。不過，有議員提出要喺其他事項表明支持港府就《基本法》第23條立法。阿絲聽返會議錄音，共有19名議員包括主席輪流發言支持23條立法。

雖然會議紀錄未上載，但相關委員會一共有20人，其中1人缺席，即係全部與會議員都有發言支持，真係比討論地區設施踴躍得多喎。

職權範圍列明推動設施及工程建設

而19名議員總發言時間達30分鐘，換言之，「其他事項」嘅發言時間，佔整個會議超過一半。另外，由於只有6名議員喺康體設施有提問，意味有13名議員在今次會議嘅唯一發言，就係支持23條立法。

值得留意嘅係，喺主席報告環節，主席葉永成講明「地工會」嘅職權範圍，係要「令區內地區設施及工程建設和推展切合區內人士的需要和期望」，包括接受政府對設施和工程嘅諮詢，同向政府提交區內人士就設施和工程嘅意見等。至於《基本法》第23條立法屬於「地工會」邊一項職權，阿絲就真係搞唔清楚喇。

麥美娟曾稱區會屬「非政權性」諮詢服務組織

睇返資料，民政及青年事務局局長麥美娟喺上月10日，曾經書面回覆立法會議員，重申區議會唔係「政權機關」，只係「非政權性」區域組織，純屬諮詢性、服務性，「只能就特定範圍內的事項接受政府的諮詢，或者協助政府提供文化、康樂、環境衞生等領域的服務」。

特首李家超亦都話，希望區議員將精力放喺服務居民上，「了解居民的急難愁盼，幫助解決日常實際問題」。至於區議員符合與否，阿絲相信「公道自在人心」。