政務SEE〡啟德體育園明年開幕 足總擬邀C朗獻技

香港發展盛事經濟，阿絲梗係樂見其成啦。《信報》政治專欄余錦賢今日（9日）透露，為慶賀啟德體育園出年開幕，香港足總計劃請外隊嚟香港助興，首選想請球星「C朗」基斯坦奴朗拿度，聽到消息阿絲即刻「心心眼」。不過，年初先發生球王美斯「甩轆」風波，最後搞到成為國際新聞，加上C朗今年初深圳之旅曾經「甩底」，咁多隻前車，真心希望港府同足總睇緊啲啊。

香港近期大型活動真係多籮籮，根據港府嘅「盛事年表」，單單今年上半年已經有88項活動。當中有唔少都係體育活動，包括「香港國際七人欖球賽」上周日喺大球場結束，今個星期五至日，維園又有「三人籃球奧運資格賽」。

嚟緊體壇仲有一大盛事，就係啟德體育園開幕。座落於前啟德機場舊址嘅啟德體育園，喺今年2月完成安裝主場館外牆所有面板，意味工程已搞掂85%，進入「埋尾」階段。預計園區今年底竣工，出年年頭落成啟用。

參考2017「英超四角賽」 盡力防「甩轆」

由覓地、技術評估到興建，歷時超過13年，正式落成啟用當然要賀一賀啦。《信報》政治專欄余錦賢今日（9日）引述「體育界猛人」消息，話足總正密鑼緊鼓籌辦外隊來港助興，當中首選係葡萄牙球星「C朗」基斯坦奴朗拿度（Cristiano Ronaldo）領銜的沙特球會艾納斯（Al Nassr FC），足總同時計劃另外物色兩三支「有睇頭」勁旅同場獻技𠻹。

消息人士話，若然成功請到艾納斯去幾個地方巡迴演出，就可以同其他地區分攤戲金咁話。足總仲考慮參考2017年香港大球場上演嘅「英超四角賽」，同時邀請幾隊球隊加入戰團。不過，年頭係英格蘭頂級聯賽賽期，所以未必請得到英超隊伍，可能轉向東歐及葡超球隊埋手。

睇返2017年7月嘅四角賽，當年足總請到利物浦、李斯特城、水晶宮同埋西布朗4支英超球隊嚟香港比賽。近4萬球迷坐爆香港大球場，氣氛相當熱烈。

報道又話，足總會盡力防止球星「甩轆」嘅尷尬場面重演。同時亦會監督好場地草地質素。

C朗年初深圳賽事延期 球迷包圍酒店抗議

阿絲聽到C朗可能訪港消息當然心花怒放啦，但今年2月香港先發生球王「美斯」缺陣風波，搞到滿城風雨，仲上埋國際新聞。與此同時，今年1月C朗原本喺深圳踢表演賽，人已到中國卻因「身體因素」臨時失場。儘管佢同球迷道歉，仲話「中國是我第二故鄉」，但大批球迷去佢下榻酒店外抗議，警察要舉旗清場，場面混亂。

事後仲有中國網紅指控主辦機構，以3至10萬元人民幣價錢出售歡迎晚宴請柬，而晚宴期間，C朗「被簽名、合影、直播，不勝其煩」。

阿絲只能講句前車可鑑，希望鬧劇唔好重演，香港球迷可以真正欣賞一場「盛事」。