政務SEE：《大公》數香港服務業三宗罪 促辦全港禮貌運動

過去4日聖誕假期超過156萬人次香港居民出境旅遊，本地餐飲、零售就呻慘，有商戶話衰過疫情啊！今日《大公報》頭版就訪問咗30位立法會議員，歸納香港服務業三宗罪，包括「黑的」有愈演越愈烈嘅趨勢、食肆態度差、服務業質素下降。對於《大公》提出要政府搞全港禮貌運動，議員「清一色」贊成。阿絲覺得與其問議員，不如做吓民調，點解香港人唔留港消費，唔通的士司機禮貌啲，大家就唔去日本玩咩？

聖誕假完結，相信大家都俾身邊朋友嘅旅遊相「洗版」，已經心思思新年假期又去邊度玩。對於近期港人一窩蜂出國旅遊或者去中國玩，《大公》就批評係香港服務業做得唔好，仲訪問30位議員分享佢哋心聲。

民建聯嘅陳恒鑌就呻，近期感受到本地服務質素下降， 話餐廳點餐、送餐可能太多單，侍應就會有「面色」。黨友梁熙就批評餐廳有用餐時限，又有「黑的」 揀客、劏客。一眾議員嘅解決方案就係搞全港「禮貌運動」喇！

唔止《大公》批評，中國官媒《環球時報》今日亦報道香港服務業態度唔好，話上月派記者去香港採訪，遇到唔識講普通話嘅便利店店員，形容「記者多次詢問，導致店員有不耐煩的情緒，對於記者的『再見』也沒有任何回應」。

老老實實，以阿絲咁多年去7仔買嘢經驗，未見過有顧客咁有禮貌同店員講bye bye，可能店員對《環球時報》記者咁親切，一時唔識俾反應啫。

《環球時報》又訪問做過發展局、民政事務局常秘嘅前高官楊立門，佢話20年前港府已經針對零售、飲食和運輸業拍宣傳片，宣揚「優質服務、制勝之道」，建議政府再搞多次禮貌運動。

相信好多香港人都記得，當年政府宣傳優質服務時，搵咗劉德華拍片，佢嘅一句「今時今日咁嘅服務態度唔夠㗎」，好多人都印象深刻。

阿絲睇返資料，禮貌運動唔係咩新嘢。以往入境處有舉辦過，叫旅客投票俾有禮貌嘅入境管制人員，最高票嗰位就會獲旅發局委任做「香港禮貌大使」。的士業界今年6月都搞過禮貌運動，請一批大學生做禮貌大使，逢一、三、五駐守港九新界繁忙的士站，協助乘客搵的士。

禮貌啲，係咪留住香港人本地消費、吸引更多旅客嚟香港玩呢？優質旅遊服務協會主席黃傑龍早前喺Facebook分享去東京玩嘅經驗，形容除咗香港人之外，當地有好多泰國、越南、馬來西亞、新加坡等遊客，以前係好少見，佢點出箇中原因，「Yen實在係平」。

對於深圳政府早前推出「即買即退稅」優惠拉港澳客人，黃傑龍嘅評價就係「深圳政府招招快狠準、招招封喉」。佢重申，本地消費市場非常淡靜，因為香港樓市、股市低迷，「只要大經濟環境一日無明顯復甦，餐飲零售呢啲附屬性行業嘅市道冇可能無端端會好好」。