週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE〡林素蔚議員質詢抄功課 222字問題91%重覆謝偉俊7年前提問

學校老師經常教學生「自己的功課自己做」,阿絲以為身為「愛國者治港」班子一員嘅立法會議員,冇理由唔明白咁顯淺嘅道理啩!令阿絲大跌眼鏡嘅係,新科議員林素蔚今日(21日)喺立法會提出嘅口頭質詢,竟然同資深議員謝偉俊喺2016年提過嘅高度相似,細閱之下,222字問題內容,有203個字相同,抄襲率高達91%,阿絲真係唔知在場嘅謝議員有咩感想喇。

《信報》政治專欄「余錦賢」今日報道,話立法會出現「新丁抄老鬼舊功課」,一名新科議員向部門提出嘅質詢,內容與一名立會老鬼喺7年前提出嘅問題如出一轍,猶如「轉世投胎」。阿絲翻查資料,發現事件主角原來係新界東南議員、專業動力嘅林素蔚。

林素蔚今日提出嘅問題關於政府預防糖尿病嘅工作,總共有3條,分別係(1)如何減少青少年及兒童飲用高糖飲料;(2)未來5個財政年度需要多少額外醫療人手及資源,同埋(3)會否研究仿效外國開徵糖稅。阿絲數過,撇除前言同標點附號,3條問題一共222字。

而謝偉俊喺2016年12月同樣問過政府預防糖尿病嘅工作,當年謝提出嘅問題共有5條。對比之下,林素蔚今次提出嘅3條問題,與謝7年前提出嘅頭3條問題,無論內容同字眼都高度重覆。

阿絲數過,唔計「鑑於」改為「鑒於」之外,222字有203字相同。特別係第3條關於開徵糖稅嘅提問,連舉例有糖稅嘅國家例子順序,以及補充說明嘅括號位置都一模一樣,恐怕都幾難有人信唔係抄襲。

林素蔚今日喺立法會讀出問題嗰陣完全無尷尬,追問時候仲同局長講「我做咩出身,你(局長)好清楚啦!」阿絲聽完先知,本身係香港理工大學社會工作文學碩士、註冊社工嘅林素蔚,之前係做醫管局服務出身。

2024年2月21日林素蔚提出的質詢。
2016年12月14日謝偉俊提出的質詢。

謝偉俊:林昨已致電解釋及道歉

有人話「只要你唔尷尬,尷尬就係別人。」心急嘅阿絲當然想知道,身為「老鬼」嘅謝偉俊,聽住自己7年前質詢「復活」有咩感想。Paul好大方咁同阿絲講,「有同事幫手更新及跟進同一議題及相關政策,當然歡迎。」

不過,佢補充一句:「惟內容當然最好是經過獨立思考及草擬。」佢仲話林議員噚日主動打俾佢解釋事件原由同多番致歉,「因此,讓事件告一段落好了。」不愧為見慣風浪嘅資深議員。

林素蔚:我都承擔負責任嘅

林素蔚今日會後接受《香港01》訪問,佢話「呢條嘢係我嘅,我都承擔負責任嘅,同事做成點,我係老闆唔能夠推卸責任」。咦,言下之意係咪質詢由議辦「同事」撰寫?作為老闆嘅林素蔚只能承擔責任?阿絲WhatsApp問過林素蔚,但暫時冇回覆。

呢個時候,阿絲諗起曾蔭權競選連任特首時講過,「我會做好呢份工」,當時俾人鬧係打工仔心態,今時今日睇返,政治人物要「做好呢份工」都唔易㗎!

相關文章

熱門文章