政務SEE｜林健鋒：搶人才似追女仔 「我靚仔啫，都要畀人知道我有內涵」

移民潮、財赤增、樓價跌、消費差。香港情況如人飲水，冷暖自知。立法會大會今日討論施政報告時，經民聯議員林健鋒就強調，政府搶人才要有實實在在嘅賣點，「好似追女仔咁，淨係有誠意係唔足夠架，一定要有實際行動去展示你嘅魅力同過人之處。又好似我靚仔啫，都要畀人知道我有內涵先得」。

香港係咪「靚仔又有內涵」？阿絲覺得真係各花入各眼，同東京、台北、首爾、倫敦、新加坡、上海比較，唔知大家覺得香港魅力何在，又有咩過人之處呢？

不過，喺消費一環，好靚仔嘅林健鋒都老實承認，唔少港人都揀咗深圳，「我哋見到香港市民一到周末，就山長水遠去到深圳，到底點解呢？因為嗰度啲嘢平啲」。佢話政府都要諗諗方法留住香港人喺本地消費喎。

自由黨批發及零售界議員邵家輝就話，香港人出境比旅客入境仲多，認為中國旅客唔使局限「一周一行」，可以變成「一周多行」，「等佢哋多啲過嚟幫襯吓，平衡香港嘅情況」。佢又建議再放寛自由行城市數目，等多啲中國人嚟香港旅遊。

民建聯會計界議員黃俊碩就讚香港係「皇帝女唔憂嫁」，「但問題在於全球有愈嚟愈多皇帝女同我哋競爭嘅時候，我哋淨係靚係唔夠，更加要學富五車，十八般武藝樣樣皆全，先至吸引到其他人嘅目光，否則呢皇帝女都好大機會嫁唔出」。

保險界嘅議員陳健波就建議效法新加坡，發債用於投資和發展，又話香港目前仍是負債率最低經濟體之一，「目前欠債率4.5%，即使2027年會上升到10%呢，但好多發展經濟體欠債都超過100%嘅，香港嘅財政係絕對穩健」。佢話保險界好希望政府發行港幣或人民幣中長期債券，「令到保險業每年近千億資金可以投資於港府或國家債券」。

但係財爺陳茂波回應議員時，形容出年嘅香港就似乎就唔多「靚仔」喇，「地緣政局持續緊張、金融偏緊、經濟不明朗等等因素，會繼續令到我哋嘅貨物出口、投資、以至消費氣氛受壓」。佢仲話應對疫情令大部分經濟體連年赤字，「淨返嘅財政空間不多，喺高通脹環境下，唔少經濟體喺短期之內難以運用貨幣政策嚟促進經濟發展」。

香港政府由幾年前腰纏萬億儲備，到今年9月底得返六千幾億。但財爺就話小心平衡財政穩健同時，會配備資源全力落實施政報告提出嘅各項措施。而特首李家超今日出席一個研討會時，話出年立咗《基本法》23條，全球企業、人才都對香港更有信心，可以更放心喺香港投資，工作同生活。