政務SEE｜財爺彈出彈入 短期不具備推資本增值稅條件 個人對港股充滿信心

港股噚日穿咗16,000點大關，轉眼今日又大跌近600點，就嚟考驗15,000點，喺瑞士達沃斯出席世界經濟論壇嘅財爺陳茂波，今日特登越洋接受《星島》電話訪問，對於11日前拋出研究資本增值稅嘅講法，佢轉口風話香港短期內唔具備推資本增值稅嘅條件。佢個人仲對港股充滿信心，引述坊間講法港股「性價比」高！唔知有冇安撫到大家嘅信心喇。

最近資本增值稅成為社會熱話，連摩根大通噚日都發表報告，話一旦引入香港，唔排除喺政策實施前，本地樓市會爆發恐慌性拋售，對樓價構成短期壓力。行會成員林健鋒今日就率先出嚟撲火，話港府唔希望本港簡單穩定稅制有改變。促請當局盡快澄清暫時唔考慮資本增值稅。

話口未完，遠在瑞士說好香港故事嘅財爺亦要出聲，佢接受《星島》獨家越洋電話訪問，話諮詢期間有唔同意見，作為負責任政府必須要聆聽，強調目前香港喺「可見短期內」，唔具備開徵資本增值稅條件，要考慮本港經濟情況、對資產市場、招商引資等影響。

阿絲睇返資料，財爺喺1月6號出席港台節目《眾言堂》，回應公眾提問時講到，資本增值稅係研究範圍之一，唔通隔咗11日就研究完？唔夠兩個禮拜就彈出彈入兩個講法喎。不過正面啲睇，都叫聆聽民意㗎喇。

港股接連穿底，財爺重申受多方面因素影響，會密切留意市場發展，又指隨住息口見頂、今年有望減息、中國經濟穩步，令大家「心入面更加有底」。佢個人對港股市場充滿信心，又引述有評論話目前港股「性價比高」！至於係咪再下調股票印花稅，佢話唔揣測。

最近見到港股嘅跌勢散戶都有啲心寒，財經專頁Tasty Money就苦中作樂，二次創作周星馳經典電影《唐伯虎點秋香》嘅對穿腸詩句，「十日九跌，累插八百，七情六欲五零四散，腰斬三萬二，一等市場」，有網友回覆「一於唔睇，兩眼合埋，三番四次五窮六絕，七連八插九百點，十分難玩」。

真係好句好句！阿絲都獻醜對一對，旨在搞笑咋，千祈唔好當真。

一插破底，兼二三條，跌四五六百點，七窮八絕九嘆氣，十分悲慘。