政務SEE｜彭博記者留港4個月真心話 愛吃沾仔記遊坪洲 睇「幻彩詠香江」最伏

旅遊發展局公布，去年訪港旅客數字3,400萬人次，恢復到2018年5成半左右。但外國人點睇香港好唔好玩？《彭博》記者Justin Ocean寫咗篇真心話，介紹喺香港生活4個月嘅感受。佢最鍾意食沾仔記，狂熱到每個禮拜最少食一次，坪洲和長洲亦係佢至愛。不過，佢老實唔客氣提醒讀者唔使去睇「幻彩詠香江」燈光show，仲用一個字總結體驗：Lame。

Justin Ocean話，過去4個月喺香港報道金融同地產新聞，而家已經返咗去紐約，雖然離開咗香港，但都特別寫篇文分享點樣喺香港生活先似個當地人。

講到美食，佢最推介中環沾仔記，形容餐廳成日要排隊、侍應態度粗魯、可能要搭枱。但一碗雙拼雲吞鯪魚球麵，就俘虜咗佢嘅胃，狂熱到每個禮拜至少幫襯一次，大讚「一碗不到5美元，天堂！」同事都頂佢唔順，請佢收一收口，唔使咁樣讚不絕口。佢亦推介上環嘅蓮香居，就算無英文菜單，用手「指指點點」，就已經叫到鍾意食嘅點心。

講到玩，佢承認自己從來唔係熱愛戶外活動嘅人，但香港由市區去山野、海灘實在太方便，絕對推介讀者要喺中環碼頭搭渡輪去離島玩，而迷你嘅坪洲和無車嘅長洲係佢嘅至愛。最鍾意行山路線喺鳳凰山，仲形容景色係令人屏息的美麗（take-your-breath-away beautiful）。

今時今日好多人都北上深圳消費，但Justin Ocean就發掘香港出色嘅小店，例如中環嘅西裝裁縫店Jantzen Tailors，形容唔華麗、唔豪華，但價格合理、選擇無窮、交付迅速。佢亦鍾意去中環PMQ元創方，推介賣金屬飾品嘅Little Finger，另一間小店係銅鑼灣珠寶店Jewel Trading Co。

但呢位彭博記者亦老實唔客氣指出香港「伏位」，仲呼籲大家唔使去。講緊就係「幻彩詠香江」燈光show，佢只係用一個字總結：Lame！再補多三個字Just trust me。

阿絲睇到都覺得尷尬，話晒「幻彩詠香江」係旅發局大力推廣嘅景點。睇返資料，呢個燈光表演由2004年推出，整體製作費達950萬，2017年再用1,000萬重新設計過音樂同燈光。而根據去年文化體育及旅遊局回覆財委會，「幻彩詠香江」每年開支要成600萬。今年剛好喺「幻彩詠香江」20周年，計落條數，原來都洗咗過億喎！

文體局曾經覆過立法會，旅發局喺2019年委託顧問公司就「幻彩詠香江」做現場問卷調查，受訪旅客對匯演嘅滿意程度有8.7分（10分為滿分），但疫情期間就無做同類調查喇。局方上個月再回覆立法會，旅遊事務署、旅遊發展局一齊檢討「幻彩詠香江」，期望今年訂立方案，為旅客帶嚟新體驗。