政務SEE｜觀塘打卡點預算不足 真花海變LED「白花海」 網民：奠堂級設計

今日網絡熱傳九龍灣東九文化中心一片LED白花海，白花滿佈階梯上，真係有啲美感不足，仲唔係幾「老嚟」喎。阿絲翻查資料，原來同施政報告有關。話說嚿年10月特首李家超喺施政報告提出，18區都要整「打卡點」，每區額外分到100萬元預算。觀塘區議會原本諗住整個真花海，點知受技術同預算所限，最後變咗LED花海，日頭未着燈就係一片白色花海。有網民搞笑話係「奠堂級設計」喎。

今屆政府愛盛事、愛打卡。2023年施政報告提出，18區「地區青年社區建設委員會」各自為當區建議設置富有特色嘅「打卡」地標，透過唔同主題、設計元素，展現地區獨特風貌，話要吸引市民同遊客去「打卡」留念。項目交俾民政及青年事務局負責，由民政事務總署向各區額外撥款100萬元。

今朝Facebook專頁「唐生大地震」分享一張白色花海相片，話係九龍灣最新嘅藝術裝置，到下午4點已經超過3,700個人俾表情符號、500個分享。有網民搞笑話係「奠堂級設計」，亦有人幽默形容係「東九龍文化殯儀館開幕」。

嗱，阿絲好公道嘅，觀塘區議會文件有介紹呢個打卡點嘅，仲有LED發光後嘅效果構想圖，夜晚發光時係粉藍色嘅花海。不過，日光日白難免就係一片片白色「花海」囉。

睇返資料，觀塘區做咗三個打卡點，其中一個喺東九文化中心嘅戶外長樓梯擺設花海。翻查觀塘區議會1月開會紀錄，區議會主席、觀塘民政事務專員何立基曾經形容項目係「打卡同靚靚」，除咗真花海，仲會擺LED燈做「夜燈」，佢話打卡點同振興地區經濟主旋律一致，「引多啲人嚟食、玩、買啫！」

好多區議員都希望花海再升級，馬軼超建議用大師級嘅水墨畫整一個水墨階梯；李淑媛建議花海加入數字藝術嘅元素；詹寶瑜仲話要應用埋可再生能源裝置。但何立基就坦白講，民政事務總署撥款有限，「我哋限米煮限飯啦，我哋喺情況之下盡量做得到最好為止」。

去到今個月初再開會，文件就更新咗設計，真花海已經唔存在喇，得返LED玫瑰花海。觀塘民政事務處話，曾就項目同康文署、建築署進行實地視察同埋跨部門會議，基於技術考慮同預算所限，未能執行原先種植真花嘅方案。而呢次會議，所有觀塘區議員都無發言討論打卡點。

根據區議會文件，花海預期喺後日（22日）完成，並會一連三日舉行試燈，到3月26號晚上6點半就有亮燈儀式，然後會擺放大約3個月。文件話，可因應花海效果、市民反應及財務安排，考慮適度延長花海嘅展示期。

至於觀塘另外兩個打卡點，一個位於觀塘公眾碼頭，加入本地插畫家Chocolate Rain嘅藝術雕塑同裝置，預計今個月完工；另一個喺觀塘巿中心裕民坊設置大型燈飾，包括一組「觀塘」立體字，以及一幅大型燈畫描繪觀塘區過去及現在嘅特色地標，暫訂5月至11月就會推出。

下次大家路過各區「打卡點」，不妨影低實際嘅效果分享俾阿絲睇，睇吓效果係驚喜、驚奇定驚嚇。