政務SEE〡「民營反駁隊」另做街訪 11位市民全撐23條 駁BBC指港人噤聲

《基本法》第23條立法係港府頭等大事，港府仲專登成立「應變反駁隊」，反駁傳媒嘅「抹黑」報道。不過，除咗官辦反駁隊外，原來仲有「民營反駁隊」。最近網上流傳一段聲稱「網民組織」「扑咪調查局」拍攝嘅街訪影片，訪問咗11名市民，全部表明支持立法，影片仲話要反駁《BBC》早前指港人對23條噤聲嘅報道。為影片擔任聲音導航嘅建制作家屈穎妍仲開宗明義：「有些受訪者根本不是逃避問題，而是逃避愛抹黑的BBC。」

港府嘅應變反駁隊成立兩個幾月以嚟，政府已經出過8次譴責聲明，對象包括海外港人組織、英國傳媒、美國領事館和美政界人士等。擔任隊長嘅保安局局長鄧炳強上周仲嚴厲批評《明報》標題惡毒𠻹。

不過，除咗政府反駁隊外，原來「民間」亦有反駁隊。Facebook流傳一段聲稱係「網民組織」「扑咪調查局」拍攝嘅影片，影片喺街頭訪問咗11個人，全部發言支持23條立法，佢地涵蓋各行各業，包括銀行、法律、運輸、人力資源、學生等。

影片搵嚟屈穎妍聲音導航：「其實市民面對街訪時候唔講嘢，未必係想逃避問題，而係想逃避成日玩抹黑嘅嗰啲西方媒體，好似《BBC》咁。」

又關《BBC》事？事緣本月初《BBC》製作咗一條片長9分鐘嘅新聞短片，闡述2003年同今年香港就23條立法，民間反應嘅分別。影片標題係「在香港討論《基本法》第23條立法是否已成公眾禁忌？」

條片用11個街訪作為切入，問市民係咪支持立法，11個市民中，支持同反對各有1人、其餘9人都無表明立場或拒絕作答，唔答理由包括「要返工」、「唔知道」、「無話支唔支持……都要接受㗎啦！」、「唔講！怕犯《國安法》！」等等。

報道出街之後一個星期，建制作家屈穎妍喺《港人港地》發表文章，指「有時候，不說話也是最好的說話方式」。文章抨擊報道係「西方高明的文宣」，「無聲勝有聲，看BBC刻意剪了十幾個不敢說話的市民，抹黑效果已經形成」。

今次呢段「民間」反駁片全長2分29秒，主要內容係11個支持意見。數量同早前《BBC》報道一開始嘅街訪數目相同，反駁意味濃厚喎，但街訪結果100%支持立法，比政府23條公眾諮詢98%支持更高㖭。

贊成反對之外 港人向《BBC》稱：好似白色恐怖

不過，阿絲想提醒屈女士，港人並非「不說話」。睇返《BBC》早前嘅報道，雖然大部分受訪市民無公開對23條嘅立場，但其實仲有表達好多意見。例如有一位黃女士話，而家香港社會輿論比較弱，大家已經唔敢講呢類話題，「我諗都係自從《國安法》實施之後，大家都唔敢再提『23條』，其實好似係有『白色恐怖』，大家永遠唔知講邊句說話會得罪呢個政權」。

另一位市民劉先生就話：「如果我（提出）意見會被重視，或者係有一定影響力，我不介意；但如果我啲言論被管制到，連我喺網上發表啲咩，或者我着件衫去機場都會唔小心俾人拉，咁我覺得我嘅言論係未必有意義……我驚我講完之後，我都會出事」。阿絲想問，贊成同反對之外，呢啲又係唔係港人嘅疑慮同意見呢？

《BBC》訪劉慧卿 葉劉 鄧炳強拒受訪

除咗街訪，《BBC》仲訪問咗前立法會議員劉慧卿同2003年時任保安局局長葉劉淑儀，分別比較兩次立法過程，港人嘅關注程度。《BBC》仲話邀請過鄧炳強㗎，不過就食檸檬。
有云：「真理越辯越明」。阿絲覺得，一個多元社會係應該容許表達不同意見。之不過，而家嘅香港社會同立法會，係唔係真係符合特首口中嘅「五光十色」呢，阿絲就覺得「公道自在人心」啦。

「民間反駁隊」反擊《BBC》外，港府前日（16日）亦發稿譴責《BBC》以虛假指控抹黑特區維護國家安全法律，指《BBC》報道王宗堯等人罪成入獄新聞時，以虛假指控詆毀《國安法》削弱香港的自治權、又話報道企圖轉移焦點，令人誤以為《國安法》立法目的係為咗「更容易檢控示威者」，令人對該法產生負面印象。