政務SEE｜中環海濱展200隻「發光蛋」裝置 深圳2022年有類似展出

港府為咗「搶旅客」，盛事真係月月有，噚日就宣布月底起喺中環海濱展出200幾隻發光蛋裝置，康文署署長劉明光大讚「非常之特別」。不過，有網民話喺深圳、福岡都有類似裝置。阿絲睇返TeamLab官網，深圳喺2022年底已有常設展，包含類似發光蛋裝置；福岡2020年已經有㖭。香港都係睇蛋㗎喇，但首次延伸到維港海上，算唔算扭出新橋段？

香港嚟緊又有盛事，3月25日至6月2日舉辦「藝術@維港2024」，康文署喺中環海濱長廊、金鐘添馬公園舉行大型藝術裝置「teamLab：光漣」展覽，展出200幾隻3至5米高嘅發光蛋。康文署署長劉明光大讚展覽「非常之特別」，用光嚟連繫人同埋自然，希望能為市民帶來耳目一新嘅感官體驗。

不過，有見多識廣嘅網民就話深圳、福岡都有啦。阿絲查返資料，2022年底深圳中洲灣C Future City有個常設嘅「TeamLab共創！未來園」展覽，展出類似發光蛋裝置，只要掂到就會改變顏色，亦會發出聲音。福岡再早啲，2020年已經有TeamLab常設展，亦包含發光蛋裝置。

3年前已經有嘅發光蛋，香港就扭一扭橋，將啲蛋蛋移師戶外，再延伸入維港，可以免費預約入場。不過安排引起立法會議員江玉歡不滿，「點解一定要免費呢？既然要登記，點解唔可以同時收一百幾十（蚊）？」佢話按200萬參觀人次計算，每人收100蚊，都幫庫房收到2億元。如果要收100蚊先有得睇蛋，唔知各位讀者又肯唔肯課金呢？

香港之前展出嘅巨型氣球心心（Chubby heart）用咗780萬元公帑引起關注，今次發光蛋造價都好多人關心，江玉歡發文話花咗5,000萬元。阿絲溫馨提醒，5,000萬元係發光蛋展覽再加埋「藝術有理」展覽。寫錯咗可能好大件事㗎，一陣被人話誤導、煽動就唔好啦。

為咗嚴正釐清事實，阿絲問返康文署，究竟單獨計發光蛋展覽，用咗幾多錢公帑呢？不過暫時未有回覆。