政務SEE〡專心一意只審23條 兩日取消5委員會會議

《基本法》第23條條例草案上周五首讀之後，立法會好似得返一項工作咁喎，就係審議23條。立法會秘書處噚日公布，法案委員會今日「朝九晚六」再加四節會議，阿絲見到原定今日開會嘅4個委員會全部都要「讓路」，涉及房屋、食安同環境衛生事務，連埋噚日改期嘅福利事務，兩日加埋已經有5個會要延期喇。特首一句「早一日得一日」，法案委員會就「未過一日加會一日」，睇怕一日未審完23條，其他民生議題都只能讓開。

截至今日（12日）中午12點，《維護國家安全條例草案》委員會由上周五下午起，已經連續審議條文5日，共開16節會議，以每節約2小時計，已大約開咗32個鐘會。截至今日晏晝，已經審議咗法案9部中嘅7部，只剩低第8部嘅「維護國家安全機制及相關保障」，同埋第9部涉及現行法例嘅修訂。今日下晝，法案委員會仲有兩節由2點半到6點40分嘅會議。

因應審議23條，立法會噚日同今日已經取消咗5個委員會會議，「消失的會議」分別有福利事務、「推動照顧者為本政策小組」、房屋事務、食安及環境衛生事務，同《建築物管理條例》修訂。其中，推動照顧者為本政策小組會議，由上月27號改到今日，點知「一改再改」，變成今年一次會都未開得成。

民生無小事？「劏房」租管、幼兒照顧、大廈維修工程採購、鼠患監察全讓路

至於房屋事務委員會，原本今日討論來年公屋入息、資產限額檢討，以及「分間單位租務管制」，不過委員會主席吳秋北、成員盧偉國、謝偉銓、楊永杰同簡慧敏，都係23條法案委員會委員。會議改到幾時未有公布，不過房屋委員會通常一個月先開一次會，因應三月初嘅兩會，距離原定下次會議只爭兩星期，喺下次開會前加到一次會議，阿絲就覺得有難度囉。

另一個要讓路嘅係修訂《建築物管理條例》法案委員會，今次嘅修例涉及業主同法團責任、大廈維修工程同大額採購等，法案舊年12月刊憲同首、二讀，早過23條已經進入「逐條審議」階段。不過，喺政府眼中，重要程度當然不及23條啦。

其餘要改期嘅，仲包括原定討論社區幼兒照顧、支援幼兒照顧計劃嘅福利事務委員會；討論食環署新鼠患監察計劃嘅食安與衛生事務委員會。

最近兩日，立法會秘書處都係因應23條法案委員會進度，每日下晝先公布聽日嘅會議安排。聽日就到星期三立法會舉行大會嘅日子，原本口頭質詢後恢復二讀嘅水務設施條例修訂，發展局噚日已經撤回，相信係要讓路俾23條法案委員會繼續加會。

話要「一日解決一個問題」嘅特首李家超，落區時候講過「民生無小事」，阿絲真心覺得，身為代議士嘅議員，除咗23條，其實仲有好多責任㗎。