英國車站鋼琴家大戰小粉紅後 有人演奏《願榮光》
![](https://photonmedia.net/wp-content/uploads/2024/01/0125-see.jpg)
上星期五喺英國倫敦聖潘克拉斯車站嘅公眾鋼琴表演好熱鬧,上演鋼琴家卡瓦納(Brendan Kavanagh)大戰小粉紅一幕,話說Brendan當時正在車站直播演奏,畀一班攞住中國國旗嘅中國人,以肖像權為由,要求Brendan刪除拍到佢哋嘅片段,呢件事都引起英國國內好多主流媒體報道。有網民就發現,事件後車站將鋼琴圍封,不過噚日好似解封咗喇!仲有人即場演奏《願榮光歸香港》添!
事件發生之後幾日,有人發現公眾鋼琴被圍封,旁邊仲有兩個警衛看守,唔畀人彈奏。呢個鋼琴其實都大有來頭,係Elton John喺2016年捐出嘅,鋼琴上仲有佢嘅簽名同留言。
不過噚日鋼琴好似解封咗,立即有高手出現!有人即場演奏《Do you hear the people sing?》同《願榮光歸香港》,在場都有唔少人圍觀,表演畀人影低咗放上社交媒體,拍攝嘅人仲一邊用英文向身邊嘅人解釋呢首係「香港國歌」(Anthem of Hong Kong)。
事件近日引起唔少討論,話說上周五,Brendan喺度演奏嘅時候,幾個聲稱為中國電視台工作嘅中國人,以保密工作為由,要求做緊直播嘅Brendan唔好影到佢哋,Brendan就表示「我哋喺英國,唔係中國」,而對方就用「肖像權」為由,要求Brendan刪除影到佢哋嘅片段。Brendan當面拒絕,其中一名中國男子仲鬧Brendan係種族主義者,話要告佢,其後警方介入,而嗰幾名中國人後來就自行離去。
呢幾名自稱正在為中國某平台拍攝春晚活動嘅中國人,後來被網民起底,原來一個係留英學生,另一個係做過春晚、國慶活動,名為張寧嘅主持,佢不時喺社交網站貼出同英國政界人士嘅合照,自稱致力中英交流,仲同孔子學院關係密切。
片段過去一個星期喺網上瘋傳,截止今日已經有超過700萬個views、6萬幾個留言。事後Brendan甚至公開表示,如果下次再遇到小粉紅,會着印有「小熊維尼」同「8964」圖像嘅衫嚟「反制」添!