政務SEE｜中港通關一周年 恆指跌 樓價跌 賣地少 港人北上洗錢有「灣區味」

一年前嘅今日（8日），香港同中國開始恢復通關，唔少香港人都諗住「由治及興」經濟暢旺喇，但阿絲睇返呢一年數據，似乎反而響起警號喎。恆生指數由舊年1月9號星期一開市21,295點，今日得返16,224點，足足蒸發咗5,071點。通關後，中港旅客逆差持續擴大，舊年1月7號星期日，港人出境比中國旅客入境多咗4萬人次，噚日又係星期日，個逆差已經擴大到14.5萬人次。

樓價方面，中原城市領先指數（CCL）由一年前158.23點，跌到最新147.21點，下跌咗7%。通關呢一年地皮都賣少咗，賣地總收入係134億。而未通關前2022年單計賣住宅、商業及工業等地皮，起碼都有287億，未通關前賣地收入，竟然仲多過通關後一倍。

阿絲數數過去一年買地嘅發展商，去年2月嘉里建設用咗14.4元億投到荃灣寶豐路住宅地，每呎地價4,578蚊；3月新地47.3億投到旺角洗衣街與亞皆老街交界大型商業地皮，每呎地價跌到3,103蚊；7月會德豐17.2億投得港島堅尼地城地皮，每呎地價係7,070元。

10月信和夥拍幾個財團用53.5億投得啟德地皮，每呎樓面地價約5,392元。最後就係12月信和獨自用2億投到大嶼山長沙地皮，每呎樓面地價2,492元。呢一年，唔少地產商都無買地，長實仲用「深水炸彈價」密密賣樓添。

通關一年樓市轉勢，地產代理監管局數據都反映到，截至去年12月31日，全港持牌代理人數39,575人，全年減少1,532人。

不過，如果拉遠到大灣區，就可以睇到由治及興嘅好處喇。今日多間中國官媒刊登通關一周年專題報道，《證券時報》就話，通關後羅湖口岸周邊嘅酒店、商舖、零售、餐飲業明顯復甦。深圳出入境邊防檢查總站統計數據顯示，2023年出入境人員達1.64億人次，日均達45.07萬人次。

《文匯報》今日報道形容香港經濟漸復甦，又引述有市民話「熟悉的香港回來了」。對於中港旅客逆差，報道歸咎香港酒店賓館房價高昂、服務質素為中國旅客詬病。《大公報》形容北上吃喝玩樂成新時尚，港人生活方式慢慢有了「灣區味」。

深圳嘅經濟復甦強勁，香港人可謂功不可沒。《南方都市報》上星期二（2日）發表專題，指距離福田口岸僅兩個地鐵站嘅領展中心城，香港遊客佔咗總客流嘅一半。南方電網深圳供電局數據顯示，2023年2月至今，深圳第三產業用電量同比增長11.47%，深圳夜間（傍晚6時至次日6時）平均用電量同比增長7.63％，深圳口岸用電量同比增長15.93%。

由治及興嘅好處，原來喺深圳最先睇到。