政務SEE〡曾轟「五星級監獄」 何君堯訪荔枝角收押所

政府上月向立法會申請55億元撥款，用嚟重建荔枝角收押所，議員何君堯大鬧計劃係「五星級監獄…仲要畀個mosque（清真寺）你？」言論隨即喺網上廣傳。何君堯口中「要用吓個腦」嘅保安局官員，日前就帶立法會保安事務委員會議員實地到荔枝角收押所視察，仲由何嘅好朋友、保安局長鄧炳強帶隊。

《星島日報》報道，本身唔係保安事務委員會委員嘅何君堯，喺截止前一刻先確認報名，係咪收到好朋友提醒就不得而知喇。報道仲引述同行議員話，「何君堯參觀過程中表現正常，細心聆聽講解及發問，未聞表達激烈的反對意見」，阿絲聽到都深感安慰。

根據立法會發放嘅相片所見，除咗何議員，同行嘅仲有陳克勤、葛珮帆、顏汶羽等16名議員，到訪嘅地方包括囚室、探訪設施、院所醫院、牙科護理室等等。新聞稿仲話，「參觀期間，議員知悉…現時收押所的羈管環境過度擠迫…設施已陳舊老化…就此，議員普遍認同有需要推行收押所重建計劃」。

「普遍認同」嘅議員，係咪包括何議員呢？《星島》引述何議員喺視察之後話，收押所環境確實擠逼，但政府都要提出證據，點解拆卸比維修更划算？至於最終投票意向，佢話明白政府立場，但現時公共財政緊絀，項目交付財委會嗰陣，佢「頂櫳都係投棄權」。

鄧炳強po相 「清真寺」僅為宗教多用途室

另外，帶隊嘅鄧炳強亦喺自己嘅Facebook專頁po文總結行程，落個tag話係「同好朋友一齊參訪」，仲專登上載一張同何議員參觀洗衣房嘅「背脊相」，亦係唯一一張同議員嘅單獨合照。雖然相片中兩人背對鏡頭，但散發出嘅友誼，隔着熒幕都能感受得到啊。

何議員之前鬧計劃係「五星級監獄… 仲要畀個清真寺你」，鄧炳強就特登po相，話傳說中嘅「清真寺」，只係一個宗教及多用途活動小課室，重申工程係「實而不華」。