政務SEE｜國慶四任特首互動見親疏 夏蕙姨呼聲最高

前晚嘅國慶晚會，衣香鬢影、政商名人雲集，呢啲咁隆重而莊嚴嘅場合，阿絲就最鍾意睇四任特首嘅座位安排同互動喇。「考第一」嘅林鄭一馬當先入場，坐喺第一排走廊位置；緊接CY入場時無同林鄭打招呼，反而同前立法會議員「象哥」黃定光揮手；李家超就無理前上司林鄭，淨係同CY夫婦握手。最後入場嘅曾蔭權係唯一一位前特首被安排坐喺第二排，入場時路過第一排三任特首，全部無打招呼。而阿絲最想見嘅董伯伯，就繼續缺席。

四任特首先後入場，不過講到最受歡迎人物，非夏蕙姨莫屬！呢邊一句「夏蕙BB」，嗰邊一句「夏蕙姨」，好多人揮晒手咁，唔知真係以為夏蕙姨開show啊！直播仲影到有男士走過去同夏蕙姨自拍，畀晒讚好手勢，成個小粉絲咁，自拍完笑到四萬咁嘅口，睇嚟民意都相當清晰喎。

鏡頭一轉，又影返四任特首，林鄭無做特首後一個人入場，丈夫林兆波唔喺身邊，傳媒再影唔到佢嘅經典「小白襪」喇，坐林鄭隔離就係新任中國外交部駐港特派員公署副特派員李永勝，二人睇嚟都幾熟噃，間中都有傾兩句咁。

CY入場時就無望向林鄭，反而主動搵「象哥」黃定光打招呼；同一時間，林鄭亦擰轉頭搵黃定光太太揮手，一時之間「象哥」兩公婆大受歡迎，喺呢個場合發揮重要作用。

現任特首李家超繼續做「愛妻號」，笑容滿面拖實夫人林麗嬋入場，熱情咁向公眾席揮手，但佢亦都無理前上司林鄭，直接走到中間座位。林鄭呢個時候雙手揸住國旗、區旗，只能「目送」李家超主動搵CY握手。

煲呔同太太入場時笑容滿臉，又同霍震霆打招呼。但行到三任特首席前，都停一停腳步，收起笑容，再起步時已經「目不斜視」，直接經過林鄭、李家超同CY，一個都無打招呼。煲呔被安排坐喺第二排中間，同政務司司長陳國基夫婦都算「有偈傾」，話晒2011年經煲呔提名同建議，陳國基先坐正入境事務處處長。

四任特首當中，李家超同梁振英最雞啄唔斷，而且不時傾到笑晒咁。睇返資料，2012年李家超喺CY做特首時，獲任命做保安局副局長，2017年再坐正局長，到嚿年4月，CY喺Facebook發文，祝李家超參選特首順利，之後李家超喺只有一人參選情況下順利當選。又難怪兩位咁好傾嘅。