政務SEE｜走好（國家）最後一公里

噚晚前特首梁振英嘅言論引起熱議，話說佢喺國慶文藝晚會致辭，講到香港要好好咁善用「一國兩制」，積極配合國家嘅「高水平對外開放」，要「盡責用心落力」維護國家主權、安全、形象同發展利益，公道啲講，以上呢幾方面，香港過去幾年都已經好用心落力喇。跟住佢就話，「以香港所長，走好最後一公里」，但《香港01》報道時，竟然變咗「走好國家最後一公里」。呢句說話，隨即引起好多網民嘅無限聯想，話晒都係國慶晚會致辭，又真係唔係幾老嚟嘅。

《香港01》噚晚報道國慶晚會，報道係咁寫嘅：「梁振英致辭指國家過去一年在國計、民生各領域取得重大進展，寄語香港要用好獨特優勢：『用好香港所長，走好國家最後一公里』。」

咦喂？報道話CY當時喺講「走好『國家』最後一公里」，但阿絲睇返CY喺社交媒體貼致辭全文嘅時候，明明無寫「國家」兩個字嘅？《01》報道最後更新時間喺噚晚8點24分，而CY貼文嘅時間喺報道出咗之後半個鐘，即大約9點。

媽啊，好亂啊！到底係報道寫錯定係CY寫錯呢？定係佢當時興之所至「爆肚」呢？正所謂差之毫釐，謬以千里，咁作為愛國愛港嘅炎黃子孫，我哋到底使唔使幫國家走好最後一公里㗎？咁阿絲惟有睇返直播fact check喇，CY的確係講「以香港所長，走好最後一公里」嘅，《01》就「僭建」咗「國家」兩隻字。

其實「走好最後一公里」呢個咁特別嘅表達手法，建制派有唔少人用過，CY喺三月去寧夏考察時，就寫過寧夏葡萄酒生產要做好境外形象同推廣，做好「最後一公里」工作，爭取更好嘅價錢。

民建聯立法會議員何俊賢今年五月亦喺社交媒體上寫過，「重塑」後嘅區議會可以成為「協助特區政府為民施政走好『最後一公里』的重要助力」； 全國政協楊莉珊又寫過區議會改制後，完善咗嘅地區治理架構有利解決政策執行「最後一公里」嘅問題。

阿絲真係百思不得其解，點解要用「最後一公里」嚟形容施政同政策執行呢？好奇百度一下，原來「最後一公里」源於中共十八大，話說2012年中共開第十八次全國代表大會時，偉大嘅習近平總書記第一次用「最後一公里」，意思就係指長途跋涉嘅最後一段里程，比喻完成一件事情最後嘅關鍵步驟、措施，之後幾年佢亦多次用「最後一公里」呢個形容詞。

喂啊！原來中國好多嘢都走緊「最後一公里」喎！由疏通科技項目、社區治理、落實中央決策部署，到人才發展體制改革等，過去十年一直都喺度走緊「最後一公里」，呢一公里喺某啲方面嚟睇都真係幾漫長。咁作為愛國愛黨人士，當然想呢啲「最後一公里」盡快走完喇，之但係「走好國家最後一公里」呢方面就……