政務SEE︱物流署長去哪兒？ 陳嘉信上月獲頒銀紫荊星章 讚政府採購和物料供應方面貢獻甚豐

政府買錯冒牌中國水鬧到滿城風雨，掀起各種陰謀論同公務員問責制等質疑聲音，不過，位處暴風圈風眼嘅政府物流服務署，署長竟然失咗蹤？

財經事務及庫務局局長許正宇星期日（17日）就事件召開緊急會議，並決定採取三重行動跟進，亦責成物流署要承擔「主體責任」，但咁重要嘅會議，政府新聞處發布張相，居然無物流服務署署長陳嘉信份，得副署長賴黃淑嫻出席？

《香港01》記者就話連日殺上辦公室都搵唔到署長，唔見佢蹤影，剩係撞到副署長行送貨嘅後門返工，唔答問題都肯微笑點頭。報道又話，根據公務員內部資料，原來署長今年5月22日滿60歲，即係6月尾公告「鑫鼎鑫商貿」得標前已經「夠鐘」退休。政府內部仲盛傳陳嘉信兩星期後就會退休，但又未見官方公布接任安排。不過，政府現時遇人手荒，部分部門有延長公務員退休年期嘅彈性，所以陳嘉信嘅去向都係未知之數。

最明顯嘅蛛絲馬跡係，陳嘉信同過往其他高層官員退休前嘅慣例一樣，獲頒勳銜。翻查資料，陳嘉信上月被列於授勳名單，獲頒授銀紫荊星章，當局話要表揚佢一直盡心竭力為政府及香港市民服務，表現傑出，仲讚佢37年公務員生涯中，喺「勞工事務、制定關於分間樓宇單位的租賃管制政策，以及政府採購和物料供應」等工作範疇「貢獻甚豐」，一直秉持着「誠信，克盡厥職」，展現出超卓嘅行政技巧同領導才能添！

譚耀宗：畀勳銜嘅嘢，發咗係可以收返嘅

勳銜頒授典禮會喺今年底舉行， 授勳委員會成員譚耀宗同傳媒講，當時基於公務員事務局推薦先至頒勳銜畀陳嘉信，仲話「畀勳銜嘅嘢，發咗係可以收返嘅」，「技術上係無問題嘅，宜家只係宣布咗啫，未發」，要視乎調查判斷責任誰屬再決定。

佢又話，要睇獲勳者喺事件中係咪涉及最大責任，「去到咁嚴重就好少有嘅，有時失職唔係佢問題，係其他問題，咁佢就唔使負呢個責任啦」，又或者衡量埋往績但「臨尾衰咗，衰成點呢，可能睇責任問題啦」。譚耀宗解釋，要收回勳銜好嚴重，唔會「暗暗地做」，要交由委員會討論。

睇返新聞處3年前發布嘅官員個人簡歷，陳嘉信1987年9月加入政務職系，2018年晉升為首長級甲級政務官，2016年10月至2020年12月出任勞工處處長；之後做過運輸及房屋局主任（特別職務）／一手住宅物業銷售監管局專員；到2022年7月接替退休前休假嘅周淑貞做政府物流服務署署長。公務員事務局局長楊何蓓茵當年公布任命，仲讚揚同事都係資深政務主任，「具備出色領導和管理才能」，有信心佢哋能夠喺新崗位為市民提供「專業高效的服務」。

不過今次以「專業高效的服務」幫公務員同事搞咗個大頭佛出嚟，真係唔知點收科呢？不過可以肯定嘅係，港島區公僕「因禍得福」，終於可以飲返港產「COOL清涼」水啦！