政務SEE｜立法會討論清理狗狗便便指引 到底清水洗地夠唔夠乾淨？？？

立法會今（25日）有一條對各區市民有廣泛影響嘅書面質詢，甚至可能係一條化學題。新民黨議員陳家珮提出，雖然目前政府有為清理狗仔嘅便便制訂指引，但列出嘅清理方法「有欠完善」，例如淨係用清水洗地，就無辦法「有效清理狗隻便溺及其殘留臭味」，所以質問當局會唔會更新指引，例如叫狗主要用清潔劑除臭去漬。環境及生態局局長謝展寰就答，要求用清潔劑洗地，要考慮埋清潔劑會唔會「跣親行人」，重申政府無打算修例規管！

陳家珮話有意見認為，現時食環署同漁護署嘅指引，建議放狗嘅人淨係用紙包狗屎就可丟入垃圾筒或者狗糞收集箱，而且淨係用清水洗地，清理唔到狗狗大小便同留低嘅臭味，影響市容。佢於是問當局有冇打算更新指引，例如「指示」放狗嘅人要用有除臭同去漬效果嘅清潔劑，沖洗狗狗便溺過嘅地方。

謝展寰好詳細咁解釋，指引有清晰要求放狗人士帶夠紙包好狗屎，同帶夠水沖狗尿。佢話一般嚟講，用足夠清水去洗嘅話，已經可以「妥當清潔」，避免引起環境衞生問題。

佢仲補充，考慮到狗仔有出街尿尿同痾尿標記領域嘅習性，又可以用足夠嘅水去清潔，所以當局依家無計劃修改法例去規管狗仔點樣喺街或者公眾地方痾屎痾尿。

至於陳家珮講嘅清潔劑，謝展寰話要考慮埋對公眾同環境嘅影響，例如清潔劑會唔會「令行人滑倒」、落到雨水渠會唔會造成污染等。佢話政府會繼續透過宣傳同教育，向公眾推廣「做個盡責任的寵物主人」嘅信息，教育大家要跟指引妥善處理狗狗嘅排泄物。

政府仲提供埋過去3年食環署因狗屎整污糟街道或公眾地方而執法嘅數字，喺2022年有16宗，總罰款金額2.25萬元；2023年19宗，罰款金額3.3萬元；舊年則有24宗，罰款金額7萬元。而呢3年間，食環署喺全港18區突擊行動巡查狗狗隨處大小二便嘅次數則介乎256至297次。