政務SEE｜大公文匯發功轟杜琪峯

呢兩日嘅洗版PO非杜琪峯專訪莫屬，好多人都讚杜Sir敢言，佢話依家香港同自己都無咗靈魂，又係嘅，香港人好耐無聽「人話」。不過惹火言論隨即引來《大公報》同《文匯報》狙擊噃，《大公報》今（4日）刊登一篇評論批「杜琪峯應尊重香港電影」，話唔應該以政治騎劫電影工作者； 《文匯報》就訪問咗王晶，佢話杜Sir過去九成作品今日拍都唔會受限，另外嗰一成受限嘅係因為「太黑幫」咁話喎。

《大公報》今日一篇評論話對杜Sir喺專訪中嘅觀點「不敢苟同」，批評杜Sir將現時港產片嘅困境歸咎於「政治因素」，對好多仍在努力嘅電影人「有欠公允」。杜Sir話香港同自己失去嘅靈魂，係人權同言論自由，對香港電影工業各方面都唔係一個好時代，評論就批杜Sir咁講令人將香港電影嘅困境同政治連結起嚟。文章批評杜Sir話香港無言論自由「實在說不通」，佢可以接受BBC專訪，仲可以公開講「香港無言論自由」，就係香港言論自由受保障嘅證據咁話喎。

評論認為造成港產片困境主因，同杜Sir口中嘅香港政治氣候「風馬牛不相及」，仲話香港近年仍然有好多優秀嘅電影上映，例如《九龍城寨之圍城》、《毒舌大狀》、《白日之下》等，如果香港真係無言論自由同人權，「電影從何而來？」評論又提到因世界各地都有電影審查制度，承認2019年後香港電影審查比過去嚴謹，但唔等於政府要刻意扼殺港產片創意。

《大公》：有人活喺舊時代 夢不能醒

其實噚日《大公報》都有出咗篇短評，話杜Sir最應該拍嘅電影係《黑社會之肥佬黎》，話人哋拍得出《九龍城寨》，說明唔係香港電影唔得，而係「有人活喺舊時代，夢不能醒」，似乎暗指杜Sir「江郎才盡」噃。

另外，《文匯報》今日就出咗篇報道，訪問咗「多名香港電影界知名人士」，其中包括「香港著名導演」王晶，佢話香港電影創作自由度無任何改變，覺得杜Sir以往嘅作品，九成今日拍都唔會受限，咁另外嗰一成呢？佢就話「太黑幫吧」。

香港影業協會理事長洪祖星就反駁全球電影巿場都經歷低潮期，原因係搵唔到新題材，香港電影巿場低迷同創作自由無關係。洪祖星仲話香港影視創作無受限制，只係嗰啲「故意拍唱衰香港影片嘅人先會覺得唔自由」。阿絲就唔係太明咩係「唱衰香港」，首部奪得康城影展金棕櫚獎嘅韓國電影《上流寄生族》，揭示韓國上流社會同低下階層陰暗面、反映社會問題，唔知咁樣算唔算唱衰呢？到底邊個可以為「唱衰香港」下一個標準呢？相信香港好多電影工作者都好想知道條線喺邊，起碼唔使吓吓擔驚受怕覺得「唔自由」吖嘛。