政務SEE〡Google地圖逾40校被改名惡搞

台灣多間學校最近畀不明人士喺Google地圖「惡搞校名」，呢個現象蔓延到香港。阿絲今日（19日）喺Google地圖發現，全港至少40間學校一度畀人「惡搞」，學校名稱改到千奇百怪、面目全非。例如「馬登基金中學」變成「馬騮基金精神病院」、「高雷中學」變成「高雷武術及拳擊專業學院」。阿絲真係唔知呢波「惡搞」點收科。

阿絲喺Google地圖至少數到40間學校一度畀人惡搞校名，受影響學校遍布港九新界、由Band1到Band3、中學到小學都有。當中多間學校變成「監獄」或「精神病院」，包括「九龍三育中學」變成「九龍監育中學」；「港九潮州公會中學」變成「港九潮州公會監獄」；「賽馬會體藝中學」變「火炭重度智障收留所」；「觀塘官立中學」變「觀塘官立監獄」。

其中，「明愛屯門馬登基金中學」變成「馬騮基金精神病院」，改名嘅人仲「盡責」到連英文名都改埋做「Monkey Foundation Psychiatric Hospital」。

學校變扒房武館 多校「永久歇業」

除咗「監獄」，好多學校仲變成另類學校，「高雷中學」被惡搞為「高雷武館」同埋「高雷武術及拳擊專業學院」；「庇理羅士女子中學」變成「東區女子扒房」。另外，唔知係咪受日本動畫《咒術迴戰》啟發，「天主教培聖中學」被改成「咒術高專」；「順利天主教中學」變成「順利都立咒術高等專門學校」。其中，幾間學校甚至同時畀人標註「永久歇業」或者「暫時關閉」。

仲有一啲語意不明嘅「惡搞」，阿絲就真係參唔透，例如「迦密愛禮信小學」變成「冰菠蘿小學」；「明愛聖若瑟中學」變成「明愛聖育強中學」；「中華基督教會何福堂書院」變成「X副校長獨裁勞改書院」同「何b仔書院」。

特別嘅係，就喺阿絲打緊呢篇稿嘅同時，有啲校名已經畀人改第二、甚至第三次，真係唔知呢波「惡搞」幾時停。

台灣律師：或涉3罪行

不過，惡搞校名有機會要負上法律責任。台灣傳媒報道，當地教育部已經要求Google提出解決方案；台南、高雄教育局就去信當地所有學校，要求留意有冇畀人改名，再上報有關情況。台南警察局就警告，竄改地標名稱可能觸犯「妨礙名譽」，當局接到舉報會依法追究。台灣有律師話，喺Google地圖「惡搞校名」可能觸犯當地「偽造文書」、「妨害名譽」，同「無故侵入他人電腦」3種罪行。

除咗法律責任，用Google地圖嘅應用程式實在太多，包括外賣程式、巴士同call車程式等等，亂改地名會造成不便。最後，阿絲奉勸一句，玩還玩，都要知道分寸呀！