政務SEE｜李家超勸年青人為排公屋限收入、浪費潛能 相信會後悔

特首李家超今日（16日）出席行政會議前見記者，講到有年青人為咗排隊上公屋，好多時「好刻意」咁令收入符合申請公屋資格，佢話咁係浪費潛能、浪費夢想。幾日前房屋局局長何永賢都有出嚟講，話年青人排公屋係扭曲人生咁話，似乎兩人口徑都相當一致噃。不過咁，年青人輪候公屋就不嬲都係熱話，阿絲廿年前畢業嘅時候都已經有朋友去排公屋喇，作為當年無排公屋嘅「前年青人」，阿絲覺得人生扭唔扭曲，就唔係得一個定義嘅，至於夢想嘅嘢……都係留返畀啲有瓦遮頭嘅人喇。

李家超今朝都用咗成3分鐘發表對年青人排隊上公屋嘅睇法，佢話人呢，應該發展自己嘅理想，如果自己嘅夢想「只係為公屋供應而係浪費咗，相信會後悔」。又話好多人今時今日嘅成功，係靠自己拼搏，經歷過努力而創造出嚟。

所以佢希望年青人發展可以多元化，「居所係重要，但自己可能發展嘅潛能、機遇，唔好單單只因為一個公屋就白費咗，因為好可能你最終成績、成果係公屋嘅畀你嘅100倍，甚至無限」。畀特首當頭棒喝後，阿絲真係見到無限啊，見到無限交租，仲有上唔到車嘅嗰種無限絕望啊。

房屋局局長何永賢早前就話，計分制真係唔鼓勵年青人去排公屋，話依家平均47至52歲先派到公屋，咁早去排，然後成日顧住個入息限額，阻礙咗人生發展，扭曲自己嘅人生。

其實相信大部分人喺年青嘅時候，的確曾經有過理想，但到咗中年，就發現原來夢想真係唔可以當飯食。而且扭曲嘅，往往唔係人生，而係個社會，總係有人話畀你聽係時候要買樓、係時候要做啲咩咁。當所有人都為咗層樓每日營營役役，完全失去人生、失去夢想，廿幾歲堅持唔排公屋走去追逐理想，到頭嚟真係唔會後悔？

而且特首講嘅「成功」要靠自己拼搏，呢個「獅子山下」故事泡沫早已爆破喇，可唔可以向上流動，唔係淨係靠個人努力㗎，唔使睇社會結構、經濟狀況咩，你估個個都可以承住70、80年代經濟起飛扶搖直上；又或者書都唔讀走去當差最後做到特首咩？要好似特首咁「優秀」，都真係唔係個個得㗎。

睇返數字，依家全港共有82萬戶公屋，逾200萬人居住。而政府新推嘅簡約公屋，首批4,400個單位早前接受申請，最快明年第一季入伙。而申請人數比首批單位數量高兩倍幾，特首話反映呢方面嘅政策正確，受歡迎程度比預期更好。