政務SEE｜陳婉嫻專欄：公屋輪候過長違國安

《國安法》實施至今近4年，大家見到「違反國安」4隻字都會觸動神經。阿絲今朝睇報紙，工聯會元老陳婉嫻喺《am730》寫嘅專欄文章，標題大大隻字「公屋輪候過長違國安」。嘩！公屋排太耐都違國安？咁香港都違反咗好多年啵，希望政府快啲解決呢個「國安隱患」啦。

嫻姐喺《am730》專欄引述習主席提出嘅「總體國家安全觀」，當中有一項係「社會安全」，佢質疑當公屋輪候時間長達6年以上，對低收入家庭嚟講，係咪叫生活安定呢？

嫻姐仲話2019年反修例運動造成嘅「亂局」，「外部干預」係主因外，房屋問題都係助燃劑。佢個推論係咁嘅：市民長期無法獲得穩定住屋，可能導致家庭壓力增加，影響家庭、個人生活品質，再進而影響社會穩定。究竟當年香港人係咪因為排唔到公屋，解決唔到房屋問題先上街呢？

睇返資料，2019年6月公屋輪候時間係5.4年，但2022年升到去6.1年，到最近跌到5.7年，但都係差過反修例運動爆發嘅時候。

其實中大喺2020年做過民調，8、9成受訪者話參加示威最主要原因係「要求政府撤銷《逃犯條例》修訂」、「表達對警方處理示威手法的不滿」、「表達對警方以暴動罪檢控示威人士的不滿」，同埋「要求成立獨立調查委員會」。

只有唔夠半數受訪者認為「香港社會逐漸缺乏向上流動機會」係「非常重要」嘅示威原因。民調結論認為，示威者參與運動係着重政治原因多過經濟原因。

嫻姐亦質疑政府排公屋時間計法，佢認為5.7年數字係計埋獨居長者輪候單人長者屋，由於獨居長者輪候公屋快啲，大約3年幾就有。房屋局將一般公屋輪候時間溝埋獨居長者輪候時間，先得出5.7年，所以低下階層實際要等嘅時間更長。佢呼籲，「當我們常高舉國家安全時，要留意保障市民安居樂業是主要工作！」