政務SEE〡解放軍動畫「空襲」台北花蓮高雄

新任台灣總統賴清德喺就職演說一句「中華民國、中華民國台灣、台灣都是稱呼我們國家的名字」，引起北京嚴厲抨擊，解放軍東部戰區噚日展開一連兩日嘅「環台軍演」。就喺軍演尾聲，東部戰區微博上載一條動畫片段，模擬解放軍海陸空全方位攻打台灣，模擬地圖仲標明空襲台北、花蓮同高雄三地。雖然條片畫質認真麻麻，但阿絲睇完條片都覺得驚驚，不如大家坐低傾下啦。

解放軍東部戰區噚日起，喺台灣周邊進行一連兩日嘅環台「聯合利劍－2024A」演習。就喺今日（24日）軍演尾聲，東部戰區微博上載一段名為「多軍種聯合打擊3D虛實動畫」片段。

影片全長1分10秒，首先聽到短促嘅軍號聲，畫面見到真實行駛中嘅軍車、海軍軍艦同空軍戰機，然後係一聲「開炮」口令，跟住就見到用動畫呈現嘅陸上飛彈車、軍艦同戰機嘅飛彈齊發。喺模擬地圖就見到台北、花蓮同高雄三地有爆炸火光。片尾仲有一首題為「殺獨神器」嘅四句詩：「鍛鑄青雲劍，習研殺手鐧，熱血報家國，逆風亮長箭」。

阿絲平心而論，3D動畫質素同而家中國國產嘅電玩遊戲都有頗大距離，但無阻中國網民對環台軍演嘅熱烈討論。截至今日下晝5點，《人民日報》微博上載「台島周邊演習消息匯總」已經有36萬人讚好、1.7萬個留言同3.1萬人分享。另外，截至今日下晝5點，微博熱搜榜首位係「中國台灣省」，第二名係「台灣當歸」，第四同第五名亦係有關台灣嘅新聞。

中國國防部：玩火者必自焚 美下月環太軍演

中國國防部發言人今日指責賴清德挑戰「一個中國」原則，將台灣推向兵凶戰危險境，行為完全係「玩火」，「玩火者必自焚」。環台軍演正係要打擊「台獨」囂張氣焰，震懾外部勢力干涉。發言人仲話，「台獨挑釁一次，反制就推進一步，直至實現祖國完全統一。」

與此同時，美國海軍太平洋艦隊前日（22日）宣布，今年嘅環太平洋軍事演習預計下月26日，喺夏威夷群島附近登場，屆時有29國、2.5人參與。阿絲只能講句，太平洋上不太平。