的士加價惹反彈 周國強：一定要鞭策到的士業皮開肉爛？

的士小巴商總會理事長周國強日前稱：「如果坐的士畀多2、3蚊，都影響到生活質素，建議你唔好搭的士！」一句話激起輿論反彈，他今（7日）接受電台訪問時強調，餐廳、公屋、電費都加價，相對的士只在10年內加價3次，「一定要鞭策到、打到的士業皮開肉爛？」保險界立法會議員陳健波在同一節目指，周國強日前的言論令人不舒服，「你無處理到市民怨氣原因，大家只會更㷫」。

港府正在處理的士加價申請，近日周國強言論引起網絡熱議。他今日接受商台《在晴朗的一天出發》訪問時，承認接受報章訪問時，曾表示「搭的士如果（加價）2、3蚊而影響咗你生活嘅，我真係建議你唔好搭的士囉！」

他為言論解畫，「我目的唔係話，喂！你駛多2、3蚊（影響）到你好緊要，我想話俾你聽好多嘢會加價。大家樂、大快活、麥當勞會加價，甚至乎公屋會加租、電費會加價，係咪的士想申請加價，10年第三次加價，要搞到大家咁嘅評論？」

周國強指，如果想的士行業有良好發展，但不准加價提高收入，又經常針對服務質素，或與非法網約白牌車比較，質疑對業界不公平，「一定要鞭策到、打到的士業皮開肉爛？我覺得好似唔係太公平囉！」他今日在出席港台《千禧年代》節目時建議，日後的士收費與最低工資掛勾每年調整。

陳健波：的士業界無處理市民怨氣

保險業界立法會議員陳健波接受商台《晴朗》訪問時，認為周國強日前的言論令人不舒服，「當然係唔舒服啦，作為一個普通消費者，你無處理到市民怨氣原因，大家只會更㷫」。他憶述以往在街邊截的士時，一半司機都是黑口黑面，到近年才有改善，「啲人㷫就㷫在覺得唔值囉！根本唔應該加，有啲人咁覺得」。

對於的士業界指，每日車輛保險支出約60元，為營運帶來困難。陳健波分析，與的士司機屢屢發生意外，誇大傷勢、虛報保險賠償有關，更指現時每年有20至25%的士會發生事故，「傷勢好輕微嘅，講到自己好嚴重啦，跟住話自己無返工呀，轉頭去咗第二度返工」。

他指，當處理保險索償時，部分的士司機未能提供證據，「的士好多都有車cam㗎，當你發生意外時，同佢攞（影片），佢話張卡唔見咗喎，或者壞咗」，現時保險業界願意承接的士保險只是少數，「呢個世界好簡單，有錢賺邊個唔爭崩頭？」

陳健波建議港府強制要求的士安裝攝錄器，並將畫面即時上載雲端平台，有助釐清賠償責任。不過有關措施令司機在車內講電話、食煙等畫面或被攝下，引起業界反對。他指，澳門實施有關措施後，的士意外數字下降。

多間傳媒引述的士落旗加2元

多間香港傳媒報道，預計政府批准市區的士（紅的）落旗加2港元至29港元，低於業界要求的加5港元至32港元。周國強指，如果加幅是2元，只能無奈接受。而身兼行政會議成員的陳健波被問到加價申請是否今日拍板，他稱：「我理解未去到呢啲位嘅，我諗仲要傾囉！」

他又以「個人身分」表示，落旗加價2元是中間落墨方案，「呢啲都係傾出嚟嘅，我唔覺得政府會夾硬嚟，如果加咗之後（的士業界）唔happy又唔得，市民好㷫又唔得」。