政務SEE〡馬逢國預算案提問 四條題目重用三年？

潮流興環保，循環再用固然好啦，但應用喺立法會議員嘅提問上，就好似唔係幾好噃。立法會喺上星期開特別財委會，議員就財政預算案提問部門開支。阿絲喺刨文件嘅時候，唔小心發現到，選委會界別嘅馬逢國，提出嘅30條問題，有4條嘅用字同嚿年，甚至前年都高度相似，連要求部門回覆嘅表格都幾乎一樣。咁環保，阿絲真係想同「大嘥鬼」一樣，畀個心心馬議員啊。

每年財政司司長喺2月公布財政預算案後，立法會議員都會就來年預算向唔同部門提出書面提問，早前有香港報章引述財委會主席陳振英話，今年88名議員一共提出3,790條書面問題，比嚿年增加一成。

阿絲年年都要刨文件，睇睇吓覺得「咦，點解條問題熟口熟面嘅？」呢條問題來自選委會界別嘅馬逢國，佢問政府檔案處喺過去一年，有冇喺其他地區購買有關香港歷史嘅歷史檔案，以及出年嘅購買預算。

阿絲睇返前幾年嘅預算案提問，發現馬議員幾乎每年都會向政府檔案處提出同樣問題。當然，立法會議員就關注項目每年向同一部門提問一啲都唔奇，但連用字、標點符號都高度重覆就有啲奇怪喇。

疑改漏年份 時光倒流問「嚿年」會推行何項目

更離奇嘅係，喺2022年嘅提問入面，馬議員已經問咗當局喺2022至23年度，將會有咩宣傳項目達到公眾教育目標；到咗2023年，馬議員又「時光倒流」，問返當局喺「2022至24年度」會有咩宣傳。馬議員上一年唔係問過2022至23年度？今年又問嚿年嘅事？

比較兩年嘅問題，除咗年份數字，用字幾乎完全一樣，阿絲不禁懷疑馬議員係咪「改漏年份」？到咗今年，文字組合稍有改變，年份亦只針對嚟緊一年。

阿絲又發現，馬議員至少自2016年開始，每年都會向檔案處提問，不過早年提問的字數較多、內容亦有較多背景資料。如2017年，馬議員問到有民間人士憂慮「六七暴動」檔案失傳；2019年問到「英國國家檔案館陸續解封香港前途談判的檔案」。但自2021年起，題目就比較少背景資料喇。

阿絲統計過，馬議員今年一共提出30條問題，當中有4條，內容同用字與嚿年都好相似。4條問題包括1條問檔案處，以及3條問保安局。至於係唔係「循環再用」，就交俾讀者判斷啦。

官員早年指每題耗公帑$4800

值得留意嘅係，議員提問其實亦要用公帑㗎。喺2014年，當時嘅財經事務及庫務局局長陳家強去信財委會，話議員提交嘅書面問題太多，建議設提問總數上限。

當時佢估計，一條問題政府需要用大約4個鐘處理，工作包括統籌、資料搜集、草擬、內部審核等， 「粗略估計，每條問題所涉及的成本約為4,800元」。嘩！呢個金額仲已經係10年前數字。如果問得其所，為公眾爭取知情權，相信無人會介意花錢，但問題質素係點，跟進開嘅行家應該最有感覺。