週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE|林健鋒提公務員節省人手 倡學杭州優才買樓補貼800萬元

近期香港股市低迷,樓市喺「減辣」後亦未見起色,「國際金融遺址」之說仲引起好多討論𠻹。立法會經濟發展委員會今日(4日)開會,儘管一眾議員盛讚財政司長陳茂波已經做咗大量工作,積極「說好香港故事」,但亦難掩對香港經濟前景憂心忡忡。

其中,經濟發展委員會主席林健鋒就將矛頭指向17萬名公務員,指港府要「善用資源」,佢話過去兩三星期,睇到公務員「除咗枱面嘅嘢……仲可以好多時間出去宣傳區議會選舉」。

佢有見公務員「非常能幹」,於是建議財爺,「最打得、最做得嗰啲,做得更多」、「節省人手嗰度係咪可以諗一諗呢?」言下之意,即係話公務員仲有好多未被發掘嘅潛力噃,林議員果然係激發員工潛能嘅好老闆啊!

不過,千慳萬慳,「托市」就無得慳嘅,林健鋒跟住話樓市係香港嘅經濟命脈,「樓市唔活,經濟就唔活」,進而影響政府稅收咁話。佢建議財爺全面「撤辣」,更提出補貼買樓嘅招數,「不但要『好招』,『怪招』都可以出埋,或者補貼買樓,好似杭州咁,我都希望你考慮一下……杭州優才可以補貼800萬(元)買樓!」

買樓仲要補貼800萬?阿絲以為聽錯,查資料先知,為咗搶人才,杭州喺2020年制訂「戰疫引才 杭向未來」計劃,向遷入杭州嘅「高層次人才」提供買樓補貼。其中細分唔同層次,分類為A級嘅人才最高可獲800萬元。至於點先係「A級人才」呢?翻查杭州嘅《人才分類目錄》,A級係指「諾貝爾獎獲得者;國家最高科學技術獎獲得者;菲爾茲獎、圖靈獎、普利茲克獎獲得者」等或同層次。

財爺無正面回應係咪接受林議員嘅建議。阿絲自覺都算係人才,不過好可惜係香港人,所以買樓補貼呢啲福利,阿絲肯定就無福消受喇。

相關文章

熱門文章